Tourism Corporation Bonaire cu resultadonan preliminar di augustus 2023 di turismo na Boneiro: 11.191 bishitante stayover

E resultadonan preliminar pa luna di augustus 2023 ta mustra un total di 11.191 bishitante stayover na Boneiro. Esaki ta bini despues di un cantidad di 11.582 bishitante stayover na luna di augustus di aña 2022 y 11.900 bishitante na luna di augustus di aña 2019.

Remarcabel ta e bahada den capacidad aereo compara cu tanto aña 2022 como aña 2019. Banda di esaki KLM a cambia di avionnan Boeing 777 pa avionnan Airbus y e disponibilidad di asiento entre e islanan ABC cerca e companianan local di aviacion ta limita.

E mercadonan di procedencia mas principal pa turismo na Boneiro ta keda consistente, cu Hulanda y Merka como e paisnan cu ta cana dilanti. Bishitantenan Hulandes a representa 5760 (51,5%) di e cantidad total di bishitante, mientras Merca den luna di augustus a contribui cu 2354 (21%) bishitante stayover. 

Corsou ta keda hunga un rol crucial den paisahe turistico di Boneiro, cu 1594 (14,3%) bishitante for di nos isla bisiña. Otro mercadonan importante cu a contribui na Boneiro su exito turistico ta entre otro Canada, Alemania, Aruba, Belgica, Suisa, Colombia y Reino Uni. Den luna di ougùstùs 2023 Alemania a bini dilanti komo un merkado fuerte, ku 207 bishitante stayover registra. Cu esaki Alemania ta resulta riba e lista di mercadonan cu a presta miho pa luna di augustus. 

Pa loke ta trata demografia di e bishitantenan, e categoria di edad entre 45 pa 54 aña ta keda bini dilanti bou di nos bishitantenan, loke ta accentua Boneiro su forsa di atraccion riba biaheronan di edad mediano cu ta en busca di un variedad amplio di experencia. 

Ora cu nos analisa e mercado Mericano mas aleu, e estadonan mas importante for di unda nos bishitantenan a bini, ta Florida, California, Texas, New York, Colorado, Pennsylvania, North Carolina, Virginia, Georgia y New Jersey.

E bishitantenan Hulandes a bini principalmente for di e provincianan den nort y den zuid di Hulanda, caminda Noord-Brabant a resalta.

Banda di esaki turismo crucero na Boneiro a duna un aporte cu 14.732 bishitante crucero cu a yega den luna di juli, facilita pa presencia di tres barco crucero durante e luna ey.