Fundacion Mariadal a anuncia e proyecto di edificio nobo di Botica Antriol

Botica Antriol ta bira un botica ultramoderno pa e barionan  Antriol, bisindario di Antriol, entre otro Nort’i Saliña, y Rincon pa reemplasa e anterior Botica Corona.

Botica Antriol lo sirbi como un botica basico publico, cu excepcion di preparacion di remedi na e botica mes. Pa ofrece un experencia mas eficiente, mas save y cu mas atencion pa cliente, lo entrega recept eloectronicamente. E dokternan di cas ta manda e receptnan den forma digital directamente pa e botica.

Saliendo for di e punto di bista di Boneiro su crecemento, e necesidad pa ampliacion di e sistema di cuido di salud y e ubicacion ideal na Antriol, na ambos banda di e botica a diseña dos edificio anexo. Den e edificionan aki por ofrece servicionan adicional, loke ta transforma e ubicacion unico y moderno aki den un ‘Centro pa Cuido’ pa Boneiro. Esaki ta nifica un mehoracion revolucionario den Fundacion Mariadal su servicio publico na pueblo di Boneiro

E botika nobo aki lo cumpli cu e exigencianan di awendia riba tereno di diseño, funcionalidad, privacidad y logistica. E diseño total ta comparabel cu Botica Playa, cu cua ta crea un estilo propio cu lo ta reconocibel den tur botica actual y di futuro di Fundacion Mariadal.

E botica ta cumpli cu tur exigencia y norma cu Inspeccion di Cuido di Salud y Hubentud (Inspectie Gezondheidszorg en Jeugd – IGZ) ta stipula pa servicio farmaceutico. Aunke Botica Antriol lo no fungi como farmasia, lo tin remedi cu ta disponibel sin recept si.

Durante e encuentro na e sitio di construccion e diputadonan Hennyson Thielman y James Kroon a hiba palabra. Na nomber di Mariadal, dr. G. Frans y boticario Neil  Nicolaas a duna splicacion tocante e proyecto y a expresa nan expectativanan.

Botica Antriol lo tin un influencia positivo riba cuido pa su clientenan pa medio di brinda un servicio eficiente den un ambiente moderno y save.