Awe mainta Minister Rocco den Corte contra Patrick Paskel y Speed Andrade

Dialuna lo tuma luga den Corte un caso sumario di un minister di Gabinete Wever Croes contra dos periodista local. Un caso unda cu ta exigi rectificacion den aire for di e dos periodistanan aki, Patrick Paskel y Speed Andrade.

Algo cu mas di dos luna atras e dos personanan aki durante un supuesto  “noticiero” den aire a ataca e mandatario, encarga cu husticia.

A menciona cu e lo tabata deteni un tempo relaciona cu un investigacion contra funcionarionan policial cu a comete iregularidad. A menciona tur esaki sin cu nunca a presenta un prueba den aire di e hecho ey. Esaki ta algo cu a sosode hopi aña atras segun e dos periodistanan aki y pa cual no tin ningun caminda tampoco un record, un documento cu ta mustra cu esaki a sosode.

E mandatario a sinti su mes y su nomber atacha. Mas pa motibo cu e ta ocupa actualmente e posicion di Minister di Husticia. E ta un situacion cu no por permiti pa sigui trece acusacion sin base contra dje y pa evita cu den futuro un biaha mas lo bini cu acusacionnan sin base.

Pa pone un paro na esaki, e mandatario a dicidi di cuminsa un caso sumario den cual ta pidi pa rectificacion y abstene di acusacionnan, sin cu por mustra prueba di esaki. E caso lo tuma luga den oranan di merdia.