Hotel RIU lo haci inversion grandi di renobacion

Minister di Turismo y Salud Publico Dangui Oduber a bishita Riu Antillas y Riu Palace caminda a ricibi un recorido. E mandatario a wordo ricibi na un manera masha caluroso pa e Manager Regional di Riu Hotels sr. Juan Blanco conhuntamente cu e dos Gerente General di ambos Hotel y demas staff.

Minister Oduber a keda masha impresiona Riu ta un compania cu tin un impacto grandi riba nos turismo y nos economia. Nan ta conta cu mil empleado di cual hopi ta Arubiano. Durante e recorido Minister Oduber a topa cu varios Arubiano cu a haya oportunidad na Riu Hotel pa por desaroya nan mes den e compania.

Locual ta importante pa menciona ta cu Riu Hotel ta comprometi pa sigui haci inversion den locual ta e mehoracion di su propiedadnan. Recientemente Riu a caba di haci un inversion di 40 miyon dollar. Esaki ta pa upgrade, drecha y renobacion di tur e cambernan den Riu Antillas. Awor Riu ta bolbe bay haci un otro inversion qu antioso di 40 miyon dollar, e biaha aki ta pa Riu Palace.

Segun Minister Oduber di e manera aki Riu Hotel ta demostra no solamente nan compromiso sino nan confia na den e maneho cu ta wordo hiba. Un maneho cu ta dunando resultado caminda Aruba ta bay registra un di e miho añanan pa cu turismo den nos historia.

E mandatario a keda masha contento di e recorido cu e la ricibi den ambos hotel. Riu hotel ta un hotel di calidad y di 5 strea. Locual ta importante ta cu nan a comenta cu nan ta zorg pa nos localnan haya e cuponan di trabou.

Finalmente e Minister Dangui Oduber ta gradici sr. Juan Blanco y su staff pa e bunita recorido. Gobierno ta desea Riu Hotel tur clase di exito pa futuro, un hotel cu sigur a contribui grandemente na Aruba su economia.