Entrevista cu Drs. Yuri Casseres riba e tema COVID: COVID no ta pandemia mas pero ta un virus activo na Aruba ainda

E tema di COVID ta un  topico cu ta keda papia hopi ainda. Despues di e pandemia tur cos a mustra di bin na e normalidad pero esaki no a kita cu te ainda tin caso di COVID, aunke e registro no ta grandi, doctor Casseres ta splica.

Actualmente ainda tin casonan di COVID na Aruba, aunke e registro no ta grandi, semper ta bon pa cuida y haci e test nan necesario  debi cu COVID por ocasiona cu un persona por haya problema cu hipercoagulacion y causa un trombosis. Tin registro den e ultimo temponan aki cu varios persona a fayece di un trombosis, pero dokter Casseres ta remarca cu ora algo asina pasa nan ta haci tur test necesario pa wak si esaki tabata tin di haber cu e virus.

Aunke Actualmente no ta un pandemia pero COVID ta keda un virus y ora e persona presenta cu sintomanan di griep nan ta haci e test pa detecta si por tin algun di e virus cu ta rond y asina por wak cua virus e pashent tin, pa ser trata.

E personanan mas vulnerabel pa cu e virus di COVID ta e pashentnan cu tin condicion medico caba, manera sobre peso, diabetes, presion halto, problema cu riñon of si bo ta uza medicamento cu por baha bo defensanan, esaki ta e pashentnan cu por haya cualkier tipo di virus, mas fuerte.

Tin virus y bacteria cu por causa e morto di un persona

Ta berdad cu tin varios virus y bacteria actualmente cu por causa un infeccion asina grave den e sistema cu hasta un persona jong of bon di salud por muri di esaki. Si net den un mal momento e persona haya un virus y no ta ser detecta cua di e virus of bacteria e pashent tin, ni maske cuanto dokter kier haci e persona por muri di dje.

Actualmente no tin niun bacteria of virus nobo cu a wordo reconoci segun dokter Casseres.

Locual cu si ta berdad ta cu ta conoci cu e bacteria y virus ta birando mas sabi y nan ta mas resistente na cualkier antibiotico, esey ta bin door di e uzo di antibiotica masal, y asina nan por wak cu tin mas bacteria cu ta mas resistente na e antibiotica normal cu nan sa duna. E ora e proceso cu e pashent ta haya ta bira otro, unda nan lo tin cu bay duna un antibiotica cu ta mas complica of mas excepcional pa trata e pashent.

Durante di pandemia e situacion di COVID ta wordo maneha internacionalmente y nacionalmente, sinembargo esaki no ta wordo maneha mas internacional, ta wordo maneha local. Internacionalmente ta keda mustra con pa trata cu esaki, pero local nan mes ta atende e pashentnan cu COVID.