Na Boneiro e situacion ta tenso, actualmente tin dos referendum na caminda. Un referendum na Telbo y uno na Curoil. Tur dos referendum a bira necesario pasobra sindicato ABVO no kier reconoce cu e no tin mayoria mas di e trahadonan organisa ni na Telbo ni na Curoil.
Na tur dos e companianan e retironan tabata masal. Codigo Civil ta regla terminacion di miembresia di un asociacion, locual de facto tur sindicato ta. En principio tin 4 motibo pa e miembresia termina, nan ta: Dor di fayecimento di e miembro; Dor di terminacion por escrito dor di e miembro; Dor di terminacion dor di e sindicato; Dor di expulsion.
Mescos cu e organisacion por expulsa un miembro inmediatamente pasobra no por tolera pa e persona keda miembro, mescos e miembro tambe tin derecho di termina su miembresia inmediatamente si e ta considera cu e no por ta miembro mas di e organisacion. Obviamente e mester duna un periodo rasonabel di anticipacion pa asina administrativamente e organisacion por procesa su retiro.
Tambe tin un ley “arbeidsgeschillenwet 1946” cu den articulo 14a tin regla cu riba peticion di un dunado di trabou y/of un of mas sindicato por pidi mediador pa organisa un referendum cu e meta pa stipula ta cua sindicato e mayoria di e trahadonan ta desea pa representa nan interesnan laboral.
Custumber ta cu sea un dunado di trabou of un sindicato ta pidi un tal referendum si tin duda cu e sindicato tin realmente e mayoria. Den caso di TELBO y tambe den caso di CUROIL e duda aki ta infunda. Den caso di Telbo, gerente y ABVO a haña notificacion di e mayoria di e trahadonan cu nan a desafilia for di ABVO entrante fin di juni 2023.
Esaki nan a haci pa medio di un carta fecha 25 di mei, pues nan a duna un luna di anticipacion. Riba e mesun fecha nan a informa gerencia pa stop cu retencion di e contribucion mensual for di nan salario. Pues na dos manera nan a duna di conoce cu nan a stop cu nan miembresia. Tambe mediador a informa gerente cu e la mira un lista caminda mayoria di e trahadonan a inscribi na AFBW.
Den caso di Curoil a sosode igual, pues e gran mayoria a tuma nan retiro for di e sindicato ABVO y tambe a instrui gerencia pa stop cu retencion di contribucion for di nan salario. Na Curoil a bin acerca cu gerencia mes a organisa un encuesta den un forma anonimo pa asina haña sa cua sindicato e mayoria di su trahadonan kier pa sinta
na mesa y representa nan interesnan laboral. Pues pa tur e partidonan envolvi, esta gerencia di tanto Telbo como Curoil, pero tambe pa e dos sindicatonan ABVO, AFBW y pa comunidad completo no por tin duda ta cua sindicato e trahadonan a apuntá pa representa nan. E intento di ABVO pa busca den tur skina di Codigo Civil y of otro leynan tin un solo meta, esta BRUHA KOS y stroba cu interesnan laboral di e trahadonan na tanto Telbo como Curoil por ser atende na un manera digno y corecto. Gritonan emocional di cu sindicalismo ta na peliger na Boneiro ta infunda. Ta netamente na Boneiro e desaroyo sindical a tuma un direccion moderno y cu sindicalismo na Boneiro a haña e reconocemento y respet cerca tanto dunado di trabou como gobiernonan. Mester realisa cu desde 10-10-10 Boneiro a scoge pa un otro rumbo y no por sigui cu e custumbernan cu tabata reina bou di Antia. P’esei mi kier felicita e 4 miembronan nobo cu a keda instala pa ABVO Boneiro y mi ta spera sinceramente cu nan por bin cu biento fresco y cu nan si ta para ariba pa practica solidarismo sindical den UNION y no actua for di posesion di poder y sigur no pa uza ley contra nan mes miembronan, pero practica husticia en general y husticia social en particular. No lubida cu ley tabata permiti sclavitud, pero cu tur hende sa cu sclavitud ta un crimen mayo contra humanidad.
No lubida cu ley tabata permiti pa retira e empleado publico femenino si e sali na estado, pero nos tur a realisa cu e ley ey tabata contra e derecho humano di e ser muhe pa bira mama. y asina Codigo Civil no t’ei pa un sindicato fuse contra su mes miembronan. No lubida cu sindicato ta existi danki na miembronan y no robes pa drechi y cu directiva t’ei pa sirbi interes di e miembronan y no pa abusa di poder cu e propio miembronan a dune.
1 comment
[…] Source link […]