Serlimar ta sali di ‘surseance van betaling’ y por cuminsa tuma decisionnan riba su mes

Aruba su  compania nacional Serlimar despues di 3 aña ta logra sali di ‘surseance van betaling’ y por continua riba su mes desaroya como compania.

Tabata mas cu claro cu Serlimar no por paga e debe astronomico di 20 miyon florin. Riba 8 di mei 2020 e Raad van Toezicht y Gerencia di Serlimar a pidi ‘surseance van betaling‘pa evita cu mester declara bancarota. Corte a aproba un surseance temporario na 19 di mei 2020.

Na april 2022, a nombra un Raad van Toezicht cu, no obstante cu e ley di Good Corporate Governance no ta finalisa, tur e miembro nan a pasa procedura di screening prome cu nan a ser nombra. Atraves di esfuersonan durante e ultimo aña a logra convence hues pa extende e ‘surseance van betaling’ dia 20 di mei 2022. A logra presupuesta fondo pa paga creditornan. Tambe mester a ahusta e tarifa di Serlimar, y a reenforsa esfuersonan di coleccion di tarifa, asina fortificando e compania su posicion financiero.

Algun otro cambionan cu a wordo haci ta e introduccion di software pa yuda cu pago y cobransa y a reorganisa e contratistanan cu a ser pasa di DOW na Serlimarna aña 2015, sin begroting, cu a causa impacto financiero desastroso pa Serlimar.Cu e plan “Nos Tera Nos Pais”, a logra realoca e ploegnan na bienestar di Naturalesa y Agricultura, bou di e DNM (Directie Natuur en Milieu)/FPNA (Fundacion Parke Nacional Arikok), BCI (Bureau City Inspector) y Santa Rosa. Esaki tambe a percura pa baha gasto di Serlimar.

Awe, 28 di augustus 2023, Serlimar ta sali di su ‘surseance van betaling’ y por cuminsa tuma decisionnan riba su mes. Esaki ta nifica cu e compania a mustra bon señal di ta recuperando y cu ta riba bon caminda pa sali di tur su debenan. Awor, Serlimar tin e oportunidad pa por reinventa su mes y sigui desaroya como compania.

Un di e puntonan cu tin atencion di Minister Ursell Arends ta e situacion di trahadonan cu ainda ta den espera di sea periodiek, bevordering y of conversacionnan di funcionamento. Ta importante pa e situacion di trahadonan keda regla, pa asina por tene tambe motivacion di trahadonan halto. Trahadonan cu a sa di sacrifica den e lucha pa rescata e compania.

Minister Arends ta felicita Serlimar cu nan extenso trabou di recuperacion y ta desea nan hopi exito pa futuro. Mas cu claro, minister ta enfatisa cu ‘saliendo for di intensive care no ta nifica cu bo por lanta hunga futbol di biaha’. Pero si ta duna espacio pa Serlimar por cuminsa planea pa por posiciona su mes riba e mercado di  procesamento di desperdicio sostenibel cu ta cay netamente den cuadro di maneho di Ministerio di Naturalesa.