Curso di Cabrito y Carne a cuminsa

Durante siman y weekend tras di lomba a inicia e curso pa maneho di Cabrito y Carne pa Proposito Comercial. Manera a wordo anuncia intere a keda halto pa e tipo di curso aki.

Departamento di Agricultura, Cria y Pesca Santa Rosa a prepara pa e di dos curso y esaki a cuminsa. Tabata diahuebs ultimo cu esaki tabata e prome curso di teoria aki na Santa Rosa for di 7’or pa 9’or di anochi. Sigui pa diasabra tras di lomba cu tabata e prome curso practico riba tereno di Santa Rosa. Aki a bishita e parti di criansa di Cabrito y Carne pa por duna un splicacion amplio dor di nos hefe di seccion di criansa den persona di sr. Edward Berben. E curso practico ta entre 9’or pa 11’or di mainta.

Riba tereno di Santa Rosa mes ta mustra diferente posibilidad pa alimentonan pa bestia. Indicando kico por ta e matanan cu por wordo planta pa alimenta bo bestianan sin problema. Teniendo na cuenta tambe e parti nutritivo cu e matanan aki tin.

A bishita diferente cura di Cabrito y Carne pa e cursistanan por haya diferente splicacion riba e maneho optimal di criansa. Conoce na ki momento un Cabrito of Carne por ta malo y kico por ta e solucion. Conoce rasanan si nan ta puro of no. Na momento di rasa bo Cabrito of Carne kico bo mester tene cuenta cune. Simanan cu e animalnan ta  “dik” con pa controla si tur cos ta bayendo bon. Cuido di Lamchi pabo por tin un ehemplar cu bon nutritivo y cuido adecuado. Asina nos por sigui menciona cu e curso aki ta lagabo cera conoci cune.

E Curso aki ta continua te c 23 di september caminda na final tur cursista lo ricibi nan certificado di participacion exitoso. Di parti di Santa Rosa nos ta desea tur cursista hopi exito y cu nan por amplia mas nan conocemento riba criansa di Cabrito y Carne pa proposito comercial.