Homber deteni pa comete acto inmoral cu menor di edad na Corsou

Continuando cu un investigacion cu polis di Barber a cuminsa cune diasabra ultimo dia 26 di augustus 2023 den oranan trempan di atardi, na unda un mama a duna di conoce cu su yiu muhe menor di edad for di un dia anterior a bay for di cas.

Den oranan di anochi di diasabra, riba indicacion di famia, polis di Barber a bay na un compleho di apartamento na Leliënberg y eynan a bin topa e damita menor di edad den compania di e homber sospechoso M.F.B. di 34 aña di edad nace na Corsou.

E sospechoso a keda detene alrededor di 20.15’or pa comete inmoralidad cu menor di edad y a present’é dilanti di un fiscal auxilia, cu a ordena su encarcelamento pendiente di mas investigacion.

A entrega e damita na e departamento cu ta atende casonan contra moral.

Polis ke bolbe hala atencion di comunidad, cu tenemento di relacion sexual of comete cualke acto inmoral cu menor di edad ta castigabel pa ley.

Cu cierto regularidad menornan di edad, di cua gran mayoria damitanan, ta bay for di cas cu sea intencion pa topa hombernan menor di edad y/o na momento cu nan ta riba caya, ta keda acerca dor di hombernan mayor di edad, pa tin intimidad cu nan.

Ta bon pa accentua, cu ni maske ta e menor mes a acepta of ofrece, esey no ta kita nada di e culpabilidad di e persona mayor di edad, di cua ta ser spera cu e sa y por husga of scoge miho.