Minister mr. Ady Thijsen: ‘Hulanda mester tin mas comprension y sosten pa Aruba’

‘Ami ta kere cu na e momentonan aki Aruba ta para fuerte. Despues di COVID bo ta mira cu Aruba ta bayendo riba e bon caminda. Nos por demostra Hulanda cu nos por. Mester bisa Hulanda pa compronde nos y duna nos sosten den esaki’.  Esaki Minister Plenipotenciario mr. Ady Thijsen a contesta riba pregunta di periodistanan na final di e reunion di Conseho di Minister di Reino (RMR) awe 25 di augustus.

Minister Thijsen a duna comentario riba e discusion den parlamento di Aruba riba e ley di Raft. Segun e mandatario mester tuma tempo pa yega na un solucion. Como ehempel sr. Thijsen a menciona e aanwijzing y ley di COHO unda den ambos caso tabata tin presion, Aruba a convence Hulanda a base di argumentonan. Minister Thijsen: ‘E ley di Raft no ta solamente un “rijkswet” cu ta mishi cu bo autonomia. Tin situacion externo cu ta toca e parti financiero, economico y social. E ta keda un decision grandi y importante. Tempo a cambia; e comunidad ta hopi dinamico. Mira cuanto cambio COVID y e guera na Ukraina a trece cune. Bo ta sintie na Hulanda y na Aruba. Mira den kico bo ta actualmente.’

Minister Thijsen a sigi bisa cu Aruba den Caribe ta e pais cu e mihor clima di inversion; conoce stabilidad poltico. ‘Bo kier stabilidad politico, loke bo tin caba. Bo kier stabilidad financiero, stabilidad economico y social. Bo kier pa bo pueblo bai dilanti. Esey ta un decision cu nos mester tuma. Mi ta haya hopi bon di Prome Minister mr. Evelyn Wever-Croes di a bisa cu mester traha na un manera cauteloso, move balancia, keda na mesa y dialoga cu argumento. Mi ta scucha cu Secretario di Estado Van Huffelen ta duna tempo y tin comprension. Pesey nos a logra hopi biaha yega na un consensus. Ami ta kere cu nos por yega na un consensus. Sigur na 2023. Si na Hulanda nan ta  pidi pa poder di compra, wel na Aruba tambe nos mester di poder di compra,’ asina Minister Thijsen a declara.

Tambe e mandatario a bisa di ta desea di mira mas union entre oposicion y gobierno, pasobra den momentonan dificil bo mester purba di sostene bo pais. Segun sr. Thijsen bo mester por laga bo diferencia un banda y awor ta e momento pa nos uni; pone forsa hunto.

Minister Thijsen a comenta tambe riba e situacion politico actual na Hulanda, cu eleccion na November benidero y cu hopi figuranan politico manera Mark Rutte, Sigrid Kaag, Hugo de Jonge y Wopke Hoekstra, mescos cu algun miembronan actual di Tweede Kamer a dicidi di retira for di politica. “E pueblo di Hulanda mester bai dicidi ken ta nan lider politico; nan Premier y cual coalicion lo bai bin. Cua coalicion cu bin nos por papia cu nan. Bo mester ta sigur di bo mes, bo tin bo argumentonan bon hinca den otro y bo ta trata cu hecho. Mi ta kere cu Aruba a mustra su mes caba; a demostra esaki. Aruba a cai den crisis pisa den 2014 unda Aruba a haya un KB. Despues a bin e crisis Venezolano unda hopi refugiado a bin Aruba – casi 15 mil – cu tabata tin un impacto hopi grandi riba Aruba,’ asina Minister Thijsen a bisa.

E mandatario a sigi bisa cu e unico punto ta cu nos mester yega na un manera unda nos ta respeta e democracia cu nos tin na Aruba, na Hulanda, Curaçao y St. Maarten. Hulanda mester compronde y tin biaha, segun sr. Thijsen, e politiconan Hulandes ta lubida cu Aruba tambe ta un derecho di estado y tin e trias politica.

Comunicado Minister Plenipotenciario mr. Ady Thijsen