Boneiru ta den tòp 25 di islanan den área karibense, Bermuda i Bahamas den enkuesta di Travel & Leisure’s World’s Best Awards.
Tur aña Travel & Leisure ta pidi nan lesadónan pa evaluá nan eksperensianan di biahe a base di nan opinion tokante e mihó hotèlnan, risòrtnan, islanan, barkunan krusero, spanan, kompanianan aéreo i hopi mas. E aña akí por a vota pa e enkuesta di ‘World’s Best Awards’ for di òktober 2022 te febrüari 2023.
‘Nos a haña e tremendo notisia ku e aña akí Boneiru ta na number 18 den e enkuesta akí. Esaki ta fantástiko pa nos isla pa klasifiká den e tòp 25 di islanan den área karibense, Bermuda i Bahamas. Nos lo kontinuá ku nos esfuersonan komo parti di e Plan di Rekuperashon di Turismo pa mantené Boneiru na un nivel haltu, di manera ku nos bishitantenan por haña e mihó eksperensia durante nan bishita na nos isla’, segun Miles Mercera, direktor di Tourism Corporation Bonaire.
