Konferensia Inisial pa trahadónan pedagógiko di SIFMA

Dia 7 di ougùstùs último SIFMA a tene den Atrium na Hotel Renaissance un konferensia pa su 200 i piku trahadónan pedagókio. Kontrali na konferensianan di inisio “Startconferentie” tradishonal SIFMA a skohe pa un konferensia interaktivo kaminda su trahadónan por a haña informashon i alabes interkambiá ku otro riba tópikonan di gran importansia pa edukashon aki na Kòrsou. E konferensia tabata karga e nòmber: “Eduká enkadená, ta igual ku karga awa hiba laman”. E tabata bou di guía profeshonal di mr. dr. René Rosalia ku su tim.

Den e parti inougural Rosalia a trese algun punto importante relashoná ku edukashon pa nos mucha i hóbennan aki na Kòrsou. Trahadónan pedagógiko mester duna nos mucha i hóbennan bon edukashon. Bon edukashon mester sirbi por lo ménos tres ophetivo prinsipal. Traspasá balornan importante manera rèspèt, pèrseveransa, koperashon, toleransia, kombibensia pa e mucha i hóbennan. Siña nan nan derechinan i mustra nan riba nan deber i obligashonnan komo siudadano, bibá huntu den e sosiedat Kòrsou. E promé parti di e konferensia a terminá ku ehèmpelnan konkreto di e edukashon enkadená ku Kòrsou a risibí for di tempu di sklabitut i ku tin su influensia te santu dia djawe.

Den e di dos parti di e programa dr. Rosalia a aktivá e trahadónan i pone nan pensa, analisá i formulá idea i pensamentu riba 8 ponensia krítiko. E ponensianan tabata:

Yu di Kòrsou ta floho, esaki ta un bèrdat? Argumentá esaki.

Drecha famia: ta pakiko mester hasi esaki? Trese argumentashon.

Stòp di hasi kos di bo koló. Analisé i duna bo opinión krítiko riba esaki.

Un yu ku ta yama su mama ku su tata bo, òf na nan nòmber ta un yu sin edukashon? Ta un bèrdat esaki?

Si bo ke bai dilanti no wak patras. Abo lo apliká esaki den bo trabou komo edukadó?

Mester di un estatua di Tula sunú òf ku paña den sentro di siudat? Dikon si i dikon no?

Den playanan di hotèl aki na Kòrsou ta tradishon ku turista ta landa separá for di hende lokal. Ta algu pa promové esaki ta?

E trahadónan pedagógiko di SIFMA a debatí i deliberá pa finalmente yega na puntonan balioso na final di e konferensia. Ku e loke nan a haña na inspirashon, motivashon i konosementu nan ta kuminsá e aña di trabou nobo ku ánimo i speransa. Kordinadónan di e konferensia di parti di SIFMA tabata señora Ruthlin Martha i sra Jacqueline Sparen.

Tabata un tremendo “startconferentie “trese pa dr. René Rosalia ku su tim. Ta bèrdat, a yega e momento pa stòp ku edukashon enkadená.