Pastor Marcel Balootje: Kere, confia, reconoce cu solamente Dios por cambia curason di hende

Hopi biaha den tur area di bida di hende decision ta wordo tuma sin consulta Dios.

Tin caminda nan ta tene Dios completamente afo, pasobra nan sa cu e decision ta contra boluntad di Dios.

Hopi decision tuma sin consulta Dios, ta causante di stress, depresion y e problema cu nos tin di salud mental awendia.

Pasobra ora nos tuma decision sin consulta, sin reconoce cu Cristo Hesus ta Señor riba tur cos , nos lo sufri e consecuencia di nos desobedencia.

Ban cohe e aspecto familiar:

Si bo conoce un homber of muher , ta bebe y ta droga , inmoral, tin mas muher of homber den su bida: No bay forma un matrimionio, ni tampoco biba cune ( Bibamento cu otro no ta di Dios, Dios a establece matrimonio, si un persona ta bon pa biba cune, e ta bon pa casa cune tambe,), y pensa cu despues cu bo casa e ta bay cambia, pasobra Cristo Hesus por cambia bida di hende si nan arepenti.

Si for di cuminsamento di un freimento entre homber y muher sla ta cay di ambos banda, e relacion mester para, pasobra ora boso casa , cas ta yena cu violencia, y boso mes y boso yuinan lo sufri, no laga e homber ni muher pensa cu ora cu nos casa lo e stop di bringa cumi. No gamble cu bo bida, y bo libertad. Cristo Hesus so por trece cambio.

Pone tur bo stimacion y emocion un banda, no wak tipo , ni tampoco placa, ni tampoco posicion, pero wak bo bida liber, dedica na Dios, sin rabia, sin angustia, sin amargura, sin stress, sin depresion, y tene bon cuenta cu bo salud mental.

Ora un hende tin problema den matrimonio, e cos ey ta traha tanto riba e mes como riba su yuinan. Cuanto mucha no a cohe caya, y cay den scuridad, pa motibo di e mal comportacion di nan mayornan. Cuanto mucha no ta yena cu rabia, pasobra nan propio mama y tata ta instiga e yiu contra otro, Pa asina gana caso contra otro dilanti di hues.

Proverbionan 3 :5-6 ta para scirbi: Confia den Señor cu henter bo curason,y no depende riba bo mes comprondemento. Den tur bo camindanan reconoc’E y E lo dirigi bo pasonan.

Den pasado tur gobierno tabata consulta cu Dios, prome cu decision wordo tuma, pero segun engaño di diabel ta aumenta riba mundo, tur cos a wordo separa for di otro, y ata nos para dilanti consecuencianan desastroso, pasobra hende ta kere cu atraves di conseheronan sin Dios, nan ta bira mas sabi cu Dios.

!Ki dia un reunion di Ministerraad lo wordo habri cu un oracion? 

!Ki ki dia Parlamento , lo tuma e decision di habri aña Parlamentario cu oracion?

!Si nos wak bon tur programma ta wordo traha sin un momento di oracion y atencion pa Dios.

Te asina leu cu nos por sa, den e bishita Real nos no ta na altura si tabatin un momento cu sikiera un cantica di Alabansa por a wordo dirigi na Dios.

Rond mundu ta sinti e cambio climatico, e calor inmenso, hendenan y animal cu ta muriendo, y ta awor e cos a cuminsa, pero toch den tur e reunionnan di Nacionnan Uni hende no ta papia,ni realisa cu mundo mester di Dios.(2Pedro 3:7-10).

E mundo a bira demasiado sabi pa consulta cu Dios.

Pero nos tur tin di corda locual ta para scirbi: Dios ta nos refugio y fortalesa, un pronto auxilio den tempo di angustia.( Salmo 46:1)