Tourism Corporation Bonaire den kolaborashon ku Surround Vibes ta amplia e fechanan di Marshe di Rincon pa un eksperensia kultural riku

Marshe di Rincon, un eksperensia di marshe outéntiko ku ta mustra e kultura bibitu di Boneiru, ta sigui konkistá kurason di nos komunidat i di nos bishitantenan for di e momentu ku a inougurá e evento akí dia 28 di mei 2023. Den kolaborashon ku Surround Vibes, Tourism Corporation Bonaire (TCB) ta kontentu di por anunsiá e fechanan nobo pa e marshe di tur luna akí na Rincon, e bario mas bieu di Boneiru. 

Marshe di Rincon a keda diseñá stratégikamente pa kai huntu ku e dianan ku tin bishita di barku krusero i a atraé un públiko diverso, ku gustosamente ke sumergí su mes den e tradishonnan riku di Boneiru, for di deskubrí nos artesania lokal te na saboriá nos sukulento delisianan lokal.

E proyekto di Marshe di Rincon ta un parti sentral di e Plan di Rekuperashon di Turismo, i ta enfoká riba kreamentu di un eksperensia kultural outéntiko pa turista i riba un oferta di oportunidat pa empresarionan lokal pa mustra nan produktonan. E inisiativa di kolaborashon akí entre TCB, Surround Vibes i empresarionan lokal ta kontribuí na diversifikashon di e produkto turístiko, oumento di e forsa di atrakshon di nos isla i fortifikashon di e dinamismo di nos sektor turístiko.

E éksito di e anterior eventonan di Marshe di Rincon a kondusí na fitbèk i evaluashon balioso. Prinsipalmente implementashon di un servisio di transporte grátis pa bai Rincon a resultá eksitoso pa loke ta trata fasilitashon di akseso na e marshe. Banda di esaki, e mapa di kaminata den Rincon ku TCB a krea, a enrikesé eksplorashon di e bario históriko akí di parti di nos bishitantenan.    

A base di e konosementu ku a optené for di e evaluashonnan, TCB stratégikamente a adaptá e skema pa Marshe di Rincon pa oumentá e impakto i forsa di atrakshon riba nos bishitantenan krusero mas tantu ainda. A selektá e siguiente fechanan pa e próksimo marshenan: 9 di ougùstùs, 13 di sèptèmber, 22 di òktober, 26 di novèmber i 26 di desèmber. 

Pa medio di amplia e eksperensia di Marshe di Rincon ku e fechanan nobo akí, Boneiru ke mustra su patrimonio kultural, ofresé enkuentro outéntiko entre nos bishitantenan i nos poblashon lokal i promové oportunidat ekonómiko pa nos empresarionan lokal. E kolaborashon kontinuo akí ta reflehá Boneiru su dedikashon pa un aserkamentu dinámiko i responsabel di turismo, di manera ku e eksperensia di nos bishitantenan ta keda enrikesé ku mantenshon di e tradishonnan úniko di nos isla.

Pa mas informashon tokante Marshe di Rincon i otro eventonan kultural eksitante na Boneiru, bai riba www.bonaireisland.com òf tuma kontakto ku nos via info@bonaireisland.com.