Selebrashon di Dia di Boneiru ku e tema ‘Huntu nos ta forma un komunidat’

Ku gran plaser Entidat Públiko ta anunsiá ku lo selebrá e Dia di Boneiru anual en grande dia 6 di sèptèmber próksimo ku e tema ‘Huntu nos ta forma un komunidat’. E dia akí ta marka un oportunidat importante pa selebrá e kultura, historia i identidat riku di Boneiru i ta pone énfasis riba importansia di un komunidat sólido i inklusivo.

E selebrashon

Durante Dia di Boneiru ta organisá diferente evento i aktividat pa selebrá diversidat i resilensia di nos isla. Lo tin presentashon di baile i músika tradishonal, kaminda e patrimonio kultural di Boneiru ta para sentral. Tambe lo tin marshe di artesania i fishi, kaminda artesanonan i hòmbernan i muhénan di fishi lo presentá nan abilidatnan i produktonan outéntiko.

Banda di esaki tin un kompetensia di pintamentu pa konsientisá nos muchanan tokante Boneiru su historia i importansia i preservashon di balornan kultural. E selebrashon lo brinda espasio tambe pa reflekshon tokante nos komunidat i e formanan den kua konhuntamente nos por traha riba un mihó futuro. 

Tema: ‘Huntu nos ta forma un komunidat’

E tema di e aña akí, ‘Huntu nos ta forma un komunidat’, ta pone énfasis riba e forsa i e unidat ku ta surgi ora hende di diferente nashonalidat ta traha huntu i ta sostené otro. E tema akí no ta enserá solamente e poblashon lokal di Boneiru, pero tambe tur e 75 nashonalidatnan ku ta forma parti di e komunidat diverso i sólido na nos isla. E ta hasi un yamada pa inklusividat, rèspèt mutuo i solidaridat, sin importá un hende su bèkgrount, orígen òf kreensia. 

Komunikashon relashoná ku e selebrashon

Entidat Públiko Boneiru ta konsiente di importansia di komunikashon efektivo pa promové enbolbimentu i partisipashon di tur suidadano. Pa e motibu akí nos ta hasi uso di diferente medio di komunikashon pa anunsiá i hasi promoshon pa selebrashon di Dia di Boneiru.  

• Wèpsait ofisial: Un sekshon spesial riba wèpsait di Entidat Públiko Boneiru lo ta dediká na selebrashon di Dia di Boneiru. Akí detayenan tokante e programa, lokalidatnan i otro informashon relevante lo ta disponibel.
• Medionan sosial: Lo hasi promoshon aktivamente pa e selebrashon riba diferente plataforma di medionan sosial. Lo traha tambe un página di Facebook i Instagram pa dia di Boneiru kaminda pa medio di mensahe, potrèt i video lo enkurashá tur hende pa partisipá na e festividatnan i pa kompartí nan eksperensianan. 

Bo tambe ke pone un mensahe via medionan sosial? No lubidá di hasi uso di e ‘hashtag’ #HuntuNosTaFormaUnKomunidat.

• Kontakto ku prensa: Entidat Públiko Boneiru lo ta disponibel pa pregunta di prensa i entrevista pa proveé medionan di komunikashon ku informashon eksakto i pa pone énfasis riba nifikashon di e selebrashon akí.

Huntu ku poblashon i tur habitante di Boneiru nos ta anhelá un selebrashon inspirativo i memorabel di Dia di Boneiru, kaminda nos ta selebrá nos forsa di kolaborashon i unidat i kaminda nos ta suprayá balor di nos komunidat diverso.