E di dos Comision Conhunto pa Cooperacion Tecnico, Cultural, Educativo y Deportivo (2023-2025), Colombia, Caricom, Aruba y Curaçao a reafirma nan boluntad pa coopera riba asuntonan di interes comun pa e region, Ministerio di Exterior a confirma awe.
Den un declaracion conhunto, despues di e reunion cu a tuma luga ayera na San Andres, e partidonan a expresa nan interes pa fortalece e relacionnan di cooperacion y amistad entre Colombia y e paisnan miembro di e Comunidad Caribense (Caricom), Aruba y Curaçao. Asina Curacao Chronicle a raporta.
Nan a enfatisa e importancia di e programa di cooperacion bilateral 2020-2022, e prome di su tipo entre Colombia y e paisnan di Caribe, cu tabata consisti di seis proyecto regional, dos proyecto di oferta y cuater proyecto bilateral desaroya durante e pandemia di Covid-19, cu resultadonan importante.
Nan a expresa e balor di tene e 2 Reunion di e Comision Conhunto pa e periodo 2023-2025, for di Caribe, pa motibo di e impacto di e tipo di programa di cooperacion regional den fortalecemento di capacidad humano y institucional di e paisnan, cu nan ta spera lo traduci den politica publico y genera un contribucion significativo na desaroyo sostenibel cu un vocacion insular y Caribeño.
Nan a reitera e compromiso di e gobiernonan pa cooperacion basa riba horizontalidad, solidaridad, beneficio mutuo y promocion di desaroyo, cu planificacion efectivo di proyectonan y iniciativa integral y concreto. Ademas, cu contratistanan defini, coordina y articula y e aplicacion di mecanismo y sistema pa monitor, sigui y evalua.
Nan a aplaudi e aprobacion di e Programa di Cooperacion nobo pa 2023-2025, cu 12 proyecto den e areanan di cambio climatico y maneho di riesgo, siguridad y defensa, desaroyo rural, desaroyo economico, cultura y deporte.
Nan a urgi pa tene e di tres reunion di e Comision Conhunto pa Cooperacion Tecnico, Educativo, Cultural y Deportivo na 2025, na un fecha y luga cu lo wordo determina via canal diplomatico.
Nan a gradici Colombia, specialmente e pueblo Raizal y otro habitantenan di e archipiélago di San Andres, Providencia y Santa Catalina pa nan boluntad di a acoge nan durante e encuentro aki.