Partido RAIZ ta un partido cu no ta goza di simpatia mas. Un partido cu a declara enfaticamente di no ta mescos cu “nan”, pero despues di a cuminsa yen di fanfaria masha liher a wordo confronta di no tin e capacidad pa ta forma parti di gobierno. Na final ci cuentra RAIZ a para bira pio cu “nan”. Nos por corda despues di eleccion RAIZ a laga sa cu nan no ta forma parti di complot ora a wordo invita pa Accion 21 y MAS pa forma un bloke, pero historia lo mustra cu berdaderamente prome cu eleccion nan plan tabata cla caba pa bay forma gobierno cu partido mep.
For di 2013 nos por a ripara un cambio. Un cambio cu a mustra cu na 2017 un total di 13200 votador no a vota pa partidonan grandi y na 2021 ela subi mas cu 19500 voto. Nos ta kere cu den un proximo eleccion esaki lo bay bira mucho mas grandi kizas hasta surpasa 30.000 votador. E motibo principal di e cambio ta falta di confiansa den e partidonan tradicional cu a gaña pueblo. Ningun bloke di partidonan politico a duna resultado y awor entre mep y RAIZ tampoco.
E guerra den gobierno su coalicion ta sigui despues di e disputa riba e construccion di e beach dilanti Embassy Suites. E prome differencia den coalicion tabata riba e contract di Eagle LNG caminda cu parlamentario Kamperveen a sali brabo brabo pero a cay na caminda despues di a bisa di pull the plug. For di e momento ey partido raiz a cuminsa perde terreno. Mas bien a resulta cu ta raiz su plug a wordo kita pa partido mep. E voz di un otro parlamentario di raiz durante di tratamento di e ley di BBO na frontera tambe a keda na caminda. Nos por corda cu parlamentario Raymond a sali grita cu si no inclui logepedie riba lista di AZV e ley di BBO na frontera lo no pasa. Otro voz mas di partido raiz cu ta grita den desierto y no ta haya oido. Prome minister a bisa pa luna di augustus 2023 lo inclui logopedie den AZV y asina partido raiz a guli e pildo y vota na fabor di BBO na frontera.
Awe nos por lesa riba 24 ora cu na januari 2024 lo evalua si lo inclui logopedie den AZV. Laga partido mep busca moda di gana tempo. Partido mep conoce e debilidad caba di partido raiz cu ta hopi scuma ma poco chuculati. Na hulandes nan ta bisa “blaffende hond bijten niet”. Nos lo no por spera ningun cambio den partido raiz paso nan sa cu politicamente nan ta morto y lo lucha pa keda na bida mas hopi cu ta possible pa keda disfruta di tur beneficionan como minister y parlamentario.
Nos por mira atrobe cu ni partido raiz ni partido mep ta interesa den e bienestar di nos pueblo sino nan propio interes. Laga pueblo sigui sufri numa. Pueblo di Aruba tur producto tin un fecha cu ta bisa ki dia e ta caduca. Un cos ta sigur e fecha aki sigur lo no ta juni 2025. Tin menasa di un KB riba lomba di tur e ministernan di e gobierno aki. Gobierno Hulandes no ta bay pa awor y gobierno mester keda deal cu e gobierno demisionario hulandes. E fundeshi riba locual e gobierno aki ta funda tabata y ta aun mas debil y awe nos ta biba e resultado ora di vota pa partidonan politico gañador cu unicamente kier bo voto pa despues dal bo un puñal den bo lomba.
Dios su tempo ta perfecto y a permiti nos pueblo mira e lobonan bisti na carne. Lo bin eleccion mas lihe cu nos por spera. Nos di partido Curpa ta kere cu lo bin un cambio den e manera di pensa di nos pueblo. E ideologianan social, liberal y progressista ta mas bien un ideologia comunista. Rond mundo tin cambio ta tuma lugar y pueblo ta prefera di vota pa un partido politico conservador. Nos di partido Curpa tin confiansa den Dios cu lo bin un cambio. Partido Curpa ta e unico alternativa.
Comunicado Eric Ras Lider di partido Curpa