Saba: Propiedat kumprá pa un kas di refugio pa violensia doméstiko

Ku e firma di e dokumentonan ofisial pa kumpra un edifisio, e Entidat Públiko Saba a tuma un paso mas dilanti pa establesé un lugá permanente pa víktima di violensia doméstiko riba e isla. E entidat públiko Saba a firma e akto di transishon di un pida tereno ku un edifisio residencial ku seis apartamento riba dje.

E propiedat ta situá na The Bottom, den un área konosí komo The Gap. Gobernador di e isla, Jonathan Johnson, na nòmber di e entidat públiko Saba, i e doño di e propiedat, Michael Levenstone, a firma e akto di transishon na ofisina di notario Marcia Bouterse.
Komishonario Eviton Heyliger, Hefe di Departamento di Desaroyo Komunitario Rosa Johnson i Koordinadó di Violensia Doméstiko Mildred Rijhiner tambe tabata presente na e firma.

E inisiativa pa establesé un kas pa víktima di violensia doméstiko ta basá riba e akuerdo di violensia doméstiko ku Ministerio di Salubridat Públiko, Bienestar i Deporte VWS. Cu e establecimento di e refugio na The Gap, Saba awor lo tin un solucion a largo plaso pa temporalmente aloja victimanan di violencia domestico. Te awor, Saba tabatin solamente un kas temporal.

Tin un maneho pa e operashonnan di e kas di refugio. E refugio lo traha den kolaborashon estrecho ku Kadera, un organisashon na Hulanda ku ta spesialisá den violensia doméstiko, i Krusada, ku ta operá e refugio na Boneiru. E intenshon ta pa habri e kas di refugio na Saba promé ku fin di e aña aki. aña.