Minister Ursell Arends ta aborda e avalancha di informacionnan incorrecto den ultimo simannan

Durante conferencia di prensa Minister di Naturalesa a tuma e oportunidad pa aclaria e avalanche di mal informacion cu a bin ta scucha den comunidad pa loke ta trata e situacion entre Gobierno di Aruba y Embassy Suites. 

Segun Minister Arends, e narativa cu mas a purba di bende ta cu e minister lo a comparti informacion confidencial cu abogado di Aruba Birdlife Conservation(ABC). “Abogado di Embassy Suites no ta splica of bisa kico e ta yama informacion confidencial. Den tur transparencia por bisa cu den ningun discusion cu e abogado a menciona cualkier informacion cu lo por ta confidencial.” Minister Arends ta expresa. 

Un otro ponencia cu ta incorecto ta cu Minister Arends ta actuando contra decision di Minister President kende ta encarga cu infrastructura. Tambe, cu tin deferencia entre ‘aanlegvergunning’ y ‘ontheffing. E berdad Minister di Infrastructura ta duna e aanlegvergunning cual ta permiso pa construi pero permiso aki ta condicional (voorwaardelijk) na permiso di excepcion (ontheffing) cual ta tene cuenta cu especienan protehi den nos naturalesa. Ta importante pa menciona cu cada un di e dos permisonan aki tin dos diferente evaluacion tambe. 

Tambe ta bisa cu e sucedido riba dia 22 juli 2023, unda Minister Arends a presenta fisicamente na e sitio caminda destruccion di naturalesa tabata tumando luga, tabata un “blunder”. Riba esaki Minister a reacciona bisando cu “si e no a presenta e dia ey, awe no lo a resta nada pa defende.” 

Terminando, Minister Arends ta lamenta cu ta purba di hiba e discussion aki na media cu informacion incorecto. Esaki mirando cu a sinta na mesa y a purba dialoga pa haya solucion cu ta pone desaroyo y naturalesa den balansa. 

“E preservacion di nos naturalesa ta crucial pa nos economia y nos bienestar riba aruba, lo mi sigui defende naturalesa cu tur e instrumentonan cu ley ta duna nos.” – Minister Ursell Arends

Comunicado Minister Ursell Arends