Den e di dos trimèster di 2023 produkto- i servisio di konsumidó na Boneiru tabata 4,6 porshento mas karu ku un aña anterior. Den e promé trimèster inflashon tabata 4,5 porshento. Na Sint Eustatius preisnan a subi riba base anual ku 3,3 porshento den e di dos trimèster. Den e promé trimèster esaki tabata 8,0 porshento. Na Saba inflashon tabata 5,2 porshento den e di dos trimèster. Un trimèster promé, esaki tabata 7,0 porshento. CBS ta informá esaki basá riba e índise di preis di konsumidó Hulanda Karibense.
Preis a subi na Boneiru ku 1,9 porshento kompará ku e trimèster anterior
Kompará ku e promé trimèster di 2023, preisnan na Boneiru a subi den e di dos trimèster ku 1,9 porshento. E oumento akí ta debí partikularmente na subida di hür i preis di outo segunda mano. Ademas, preis di gasolin a subi e trimèster akí ku 4,9 porshento kompará ku e trimèster anterior.
Preis di kuminda a subi den e di dos trimèster ku 1,1 porshento kompará ku e promé trimèster di 2023. Preis di bèrdura fresku a baha ku 5,5 porshento.
Na Sint Eustatius preisnan a baha ku 0,8 porshento kompará ku e promé trimèster di 2023
Preis di konsumidó na Sint Eustatius a baha den e di dos trimèster di 2023 ku 0,8 porshento kompará ku e trimèster anterior.
Preis di paña i sapatu a subi e trimèster akí ku 4,2 porshento. Preis di mueble a baha ku 7,4 porshento. Preis di gasolin a baha ku 3,7 porshento. Ademas, transporte aéreo di pasahero ta mustra un bahada den preis di 8,2 porshento.
Preis di kuminda i bibida sin alkohòl tabata 0,8 porshento mas karu den e último trimèster ku den e promé trimèster. Pan tabata 5,0 porshento mas karu. Remarkabel tabata e bahada di preis di webu: esaki a baha ku 37,9 porshento.
Preisnan na Saba: 1,1 porshento mas haltu ku e trimèster anterior
Na Saba den e di dos trimèster di 2023, a sali konsumidónan promedio 1,1 porshento mas karu kompará ku e trimèster anterior. Preis di paña i sapatu a subi ku 4,2 porshento i pasashi ku avion tabata 17,0 porshento mas karu. Preis di produkto pa mantenshon di kas a baha ku 9,2 porshento kompará ku e trimèster anterior.
Preis di kuminda i bibida sin alkohòl a subi ku 1,2 porshento den e último trimèster. Galiña tabata 9,4 porshento mas barata den e di dos trimèster i karni di baka tabata 6,3 porshento mas barata ku un trimèster anterior. Chukulati tabata 9,8 porshento mas karu.
Sifranan tentativo
E sifranan tokante e di dos trimèster di 2023 ta tentativo i lo stipulá nan definitivamente ora di publiká e di tres trimèster di 2023.
Fuentenan:
StatLine – Caribisch Nederland
https://opendata.cbs.nl/CBS/nl/dataset/84046NED/table?dl=BFA9
<link subsidie vastrecht elektra> https://www.webbonaire.com/2022/10/28/verlaging-tarieven-elektriciteit-web-bonaire/
1 comment
[…] Source link […]