Parlamentario Marco Berlis (MEP): KOR-Regeling y desconta e 7% di BBO na frontera

Coregiendo sra. Lejuez su expresionnan incorecto riba Ley di BBO

Mi a tuma nota cu sra. Daphne Lejuez a expresa diferente remarkenan baho y incorecto dimi articulonan riba BBO na frontera. Sra. Lejuez, mi persona semper ta open pa un combersacion cu argumentonan funda, cu e documentonan necesario y cu e informacion corecto manera nos profesionalnan mes ta splica. Pues si bo persona ta desea di berdaderamente hiba e discusion riba BBO na frontera, por contact mi libremente pa haci esaki. Mi ta kere como ex parlamentario mi no tin cu splica bo con e trabou aki ta hinca den otro, pero por si acaso bo persona a lubida, laga mi refresca e memoria.  

Sesionnan BBO na frontera

Como Parlamentario nos a wordo informa den diferente manera y door di diferente profesional. Riba e topico di BBO na frontera nos a haya mas di 7 session di informacion y Q & A, nos a lesa y trata e ley, nos tin acceso na expertonan kendenan nos ta consulta constantemente prome ta publica algo. Nos a sinta cu gremionan, nos a ricibi nan carta, nos a tene nan puntonan na consideracion y semper ta en busca di e posibilidad pa ‘meet each other halfway’. Pues e informacionnan mi no ta compartinan di un dia pa otro, pero ta oranan largo di reunion, lesa, puntra, bolbe puntra y sigui puntra. E ta mi responsabilidad y mi compromiso pa trece informacion corecto y funda pa pueblo y mi lo kier sugeri bo persona pa adopta e principionan aki den bo carera politico! Ta lamentabel cu sra. Lejuez ta scoge pa ataca mi basa riba conclusionnan eroneo paso su fuentenan di informacion ta limita y no ta permiti’e educa su mes riba e materia completamente. Sra.Lejuez incorectamente kier haci pueblo kere cu BBO na frontera ta causa schakel y ta acumula 14% enbes di 7% y esaki ta un fake news total! Laga mi splica dicon.

Compania cu ta cay bao KOR-regeling

Lesando, puntrando y comprondiendo e ley aki, mi ta desea di haci e siguiente coreccionnan riba Sra. Lejuez su ultimo post riba e tema di KOR-regeling: Entrante 1 di Augustus ta permiti pa comerciantenan chikito, a base di un maneho adapta pa registra su mes boluntariamente pa BBO/BAVP y BAZV maske su volume di benta ta bao di afl.50.000 pa aña. E comerciante cu opta pa registra su mes boluntariamente ta haya automaticamente e derecho pa deduci e BBO na frontera y lo ta subheto na e cobransa di BBO/BAVP y BAZV y tambe na e deber di entrega mensualmente su declaracion. Kiermen, si e comerciante chikito ta desea e mes por zorg pa e no paga e 7% ey door di registra debidamente. Tin tempo ainda ya cu e ley nobo ta drenta na vigor dia prome di Augustus.

Compania cu no por desconta e 7% di BBO na frontera

Esaki tambe tabata un di e ponencianan di Sra.Lejuez cu ta eroneo y ta mal informa pueblo riba dje. Un compania cu ta importa productonan di afor pa propio uzo den su negoshi cu no ta destina pa wordo rebendi manera lessenaar, cashi, boekenrek, computer, airco parts et cetera lo cobra 7% di BBO na frontera riba e douanewaarde. E peso di impuesto, esta 7%, ta keda igual cu si e comerciante aki lo a cumpra e productonan aki riba mercado local. Tur gasto di operacion incluso gastonan di producto pa propio uzo ta deducibel di e ganashi total di e compania. No por mantene e argumento cu e BBO paga na frontera pa productonan pa propio uzo no ta deducibel. BBO semper ta deducibel den tur compania.

Conclusion

Sra. Lejuez ta cumpli debidamente cu e Facebook Politician Profile: Fuente di informacion limita, ta critica sin brinda otro solucion, no ta interesa pa sinta na mesa y debati debidamente, ta brinda informacion incorecto y ta doe mee cu politica baho door di ataca. Sra. Lejuez, ainda bo ta na tempo pa ahusta bo perfil politico y enfoca riba un politica transparente y corecto ora di informa nos pueblo. Hungando e mesun politica cu bo lunch partner ta hunga, esta esun di Old Boys, e politica di desinformacion, manipulacion y gañamento no ta faborece nos pueblo di ningun manera. Madures no ta traduci su mes na ataca cu mentira. Si di berdad bo ta stima e pueblo aki, si di berdad bo ta profesional anto mi ta recomenda bo persona pa cana e caminda corecto pa haya informacion necesario pa forma bo opinion. Unabes cu ta asina leu, expresa bo mes libremente y no lubida di brinda un otro posibel solucion tambe paso Sra. Lejuez, abo tambe conoce e situacion financiero cu nos a haya pais den 2017! Tin hende ta kere den sra.Lejuez, no defrauda nan confiansa!

Si Sra. Lejuez y pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!