Un Tula sunú den Punda

Kousa Promé a tuma nota na página 6 di e programa “Herdenkingsjaar Afschaffing Slavernij 2023-2024” ku dia 17 di ougùstùs 2023 ta instalá e estatua di e “naakte” Tula.  Un Tula sunú den sentro di siudat.

Ta imperativo pa analisá e desishon aki bon i tene bon kuenta ku e konsekuenshanan ku e desishon aki por trese kuné. Sigur ora ku análisisnan ta mustra ku for di 1973 tabatin hopi resistensia kontra di e estatua aki. E forma ku a yega na e estatua aki i e estatua riba su mes, no ta kumpli ku kriterionan pa un estatua pa un érue di e taya di Tula. 

Promé ku tur kos tin algun punto importante ku mester para ketu na dje. Ki meta kier logra ku ponementu di un estatua sunú di Tula den Punda? 

Ki balor e estatua aki mester tin pa pueblo en general i sigur pa nos hóbennan i futuro generashonnan? 

Ki balor ta duna na análisis di bida, historia i lucha di Tula pa por yega na un estatua mas representativo?

Ta un estatua sunú di Tula mester representá e érue i gran luchadó di nos pais? 

Ki mensahe nos ke manda pa pueblo di Kòrsou i pa mundu? 

Te kon leu a embolbí pueblo den kreamentu di un estatua di Tula ?

Kousa Promé ta di opinion ku estatua di un érue manera Tula ta rekerí embolbimentu di henter pueblo. Ideal lo tabata si a instalá un komishon ofisial di spesialista ku ta karga aprobashon di pueblo pa traha un plan pa kana yega na un estatua digno pa érue Tula. Den e kaso spesífiko aki sigur mester tin embolbimentu di tur nos eskultornan lokal. 

Pa yega na un estatua di un érue manera Tula ta nesesario pa studia su bida, historia i su lucha profundamente.  

Un estatua kreá pa un artista yu di Kòrsou lo kontribuí na rèspèt, orguyo i balor propio di e yu-di-Kòrsou. Lo e gosa indudablemente di aprobashon di pueblo en general. 

E estatua mester inspirá i motivá hóbennan i e pueblo di Kòrsou pa sigui ku e lucha di emansipashon. E estatua mester yuda reforsá identidat di e  

yu-di-Kòrsou. 

 Ku e argumentunan ariba menshoná Kousa Promé ta indiká klaramente ku e ta rechasá e estatua sunú di Tula den sentro di siudat. Un estatua di Komandante Tula mester yena nos ku orguyo i duna nos forsa pa sigui lucha pa nos emansipashon.  

Kousa Promé ta spera ku pueblo di Kòrsou tambe tuma un posishon figo riba e asuntu importante aki i duna nan kontribushon pa Kòrsou no haña un estatua sunú pero unu ku e pueblo aki realmente meresé.