Buki ‘Maternidad’, ta contribui na pilot intercambio cultural den nos Reino

DEVENTER

Modelo y actriz Zuleika Coffie di Aruba, a entrega ‘su’ buki quadrilingual (den 4 lenga) ‘MATERNIDAD’ na co-burgemeester di Deventer, Sr. Marcel Elferink, como acto di apertura di e exposicion ‘DESTINO PA SOÑO’, auspicia pa Oranjevereniging (https://deventeroranjevereniging.nl/kunstcircuit-2023/).

Oranjevereniging a ofrece cuminda caribeño, cu fundacion AABA (Antillaans en Arubaans Beraad Apeldoorn: www.stichting-aaba.nl)) a recomenda. ‘MATERNIDAD’ a ser publica pa LM Publishers (https://lmpublishers.nl/product/moederschap/).  E buki universal aki ta un proyecto di cooperacion entre Zuleika y GN (www.gustavenouel.nl), cu apoyo di diferente otro artista Arubano.

E exposicion di  25 artista regional, titula DESTINO PA SOÑO, ta parti di un intercambio cultural entre ‘mama’ Hulanda y Sint Maarten, entre Kunstcircuit (www.kunstcircuit.nl) y NIA (www.nationalinstituteofarts.com/).

Na Kunstcircuit por mira te dia 16 di Juli arte cu ta busca connection cultural entre e diferente parti di nos Reino.

Lilian Vos (Biblioteca) a coördina henter e proyecto piloto hunto cu directora di NIA y GN, iniciador di e proyecto, tabata ‘consehero general’. Manon van ‘t Spijker (www.base4dance.nl) a bay Sint Maarten hunto cu algun bailarin y artista/docente Rob van Putten y Annemarie van Uden, despues cu Silvia Carty, Jonathan Van Anneman y Arlene Halley di NIA (www.nationalinstituteofarts.com/) a comparti nan expertise na Deventer. Artista/docente Silvia Carty a duna workshop tambe den estudio di ‘KUNSTWERKT’ na varios artistas “especial”, alumnonan  di Marianne de Bakker. Galería Art Brut a organiza un subasta di arte pa apoya nan intercambio cultural cu Sint Maarten. Tambe na artistanan cu GN ta guia na asociacion di artista DAK, Silvia Carty a duna un workshop di Pop Art.(https://www.deventeramateurkunstenaars.nl/lessen-en-bebegeleidings-1)

Culminacion di e intercambio cultural tabata un presentacion den Deventer Schouwburg, di e proyecto interdisciplinario na Sint Maarten, cu baile y arte visual (Art2Fuse) di Base4Dance/Manon y e artistanan Rob y Annemarie.

E pilot (‘grassroot’) a logra, y awor lo cuminsa prepara intercambio cultural, cu mas parti di Reino, pa futuro. Tambe cu teatro,  musica, moda, literatura y/o otro disciplina artistico. E iniciativa ‘grass-root’ di GN tin apoyo di coordinadora Lilian Vos (Biblioteca), Oranjevereniging (DOV), Stadhuis di Deventer, Fondo pa Participacion Cultural, Fundacion Kunstwerkt, Fundacion AABA y otro socionan.

APELDOORN
Tambe na Apeldoorn, recientemente, Zuleika Coffie y GN a entrega e buki di MATERNIDAD na wethouder Sunita Biharie, como un acto di apertura di KOM.
KOM ta un festival multicultural internacional nobo, cu a cuminsa na Apeldoorn na 2022, caminda varios cultura ta topa y tin hopi diversidad. Cu musica, danza, arte (performance), workshops, cuenta/poesia, moda, actividad infantil, exposicion y actividad di diferente cultura cu ta participa. Tambe cu cuminda di  China, Turquía, Marroco, Etiopía, Líbano, Indonesia, África, islanan di Cabo Verde, Eritrea, Iran, Caribe, et cetera. KOM kier stimula encuentro colorido, cu  tema di Naturaleza, Cultura y Diversidad. KOM ta ser apoya e.o. pa Amnesty, Energieke Maten, Zero Waste, IVN, Refugee Work, fundacion Samenspraak y Stimenz. Desde e prome aña, GN a ser invita pa hasi ‘street-sketch’ na KOM.

Na 2023 tabatin escritor di diferente pais, cu a lesa algo di nan buki pa publico por a hasi pregunta despues. Actriz Zuleika Coffie, biba na Amsterdam pero representando Aruba, tabata un sorpresa. Cu hopi emocion Zuleika a comparti un historia intimo cu su poesia ‘RESPET’, den e 4 lenga mas papia na Aruba. Publico presente a gusta e actuacion masha y a pidi Zuleika pa sigi lesa mas poesia. Un actuacion hopi exitoso… di e actriz Arubiano.

Tambe ta un soño pa comparti ‘MATERNIDAD’ na nos Reino den Caribe. Maternidad (cu subtítulo: DI SOÑO PA REALIDAD), ta un proyecto di cooperacion den ‘imagen y palabra’ entre dos artísta profesional Arubiano reconosi. Un buki cu no ta unicamente un oda na maternidad universal (y particular), sino tambe e aspiracion pa juda crea un brug entre e partinan Europeo y Caribense di Reino Hulandes y entre nan y resto di mundo, den e sentido artistico di e palabra.