Kiko tabata resultado di e promé 6 lunanan di aña 2023 kompará ku aña 2022?
Boneiru a mustra un resiliensia i kresemente eksepshonal den sektor turístiko durante e promé 6 lunanan di aña 2023 kompará ku aña 2022. No opstante e retonan ku Boneiru a konfrontá, ku orguyo nos isla a yama bon biní na un kantidat di 88.749 bishitante. Esaki ta mas ku e kantidatnan registrá den tantu aña 2022 (85.800 bishitante) komo den aña 2019 (83.100 bishitante), kontá durante e mesun periodo, esta yanüari te ku yüni 2023. Esaki ta representá un kresementu di aproksimadamente 6,8% for di 2019 pa 2023 i un kresementu di 3,3% for di 2022 pa 2023.
Luna di yanüari a ranka sali ku un velosidat impreshonante ku 16.495 bishitante i luna di febrüari a sigui djis su tras ku 16.147. Luna di mart a kontinuá ku e tendensia positivo akí ku 16.450 bishitante. Miéntras ku luna di aprel a konosé un kaida leve ku 15.513 bishitante, luna di mei i luna di yüni a mira respektivamente 12.622 i 11.522 bishitante.
E komposishon di bishitante a reflehá un variedat grandi di nashonalidat. Hulanda a bini dilanti komo e merkado di orígen mas grandi i a kontribuí ku 46,47% na e kantidat total di bishitante. Merka a sigui djis su tras i tabata bon pa 24,05% di e bishitantenan, miéntras Kòrsou a tuma 13,4% di e kantidat total di bishitante pa su kuenta. Otro paisnan, entre otro Aruba, Alemania, Bélgika, Suisa, Colombia, Canada i Reino Uní, konhuntamente a forma e porsentahe restante di e tòp 10 di merkado di orígen.
E datonan a mustra un meskla fasinante di bishitantenan ku a bini pa promé biaha i bishitantenan fiel ku ta regresá kada biaha. Mas òf ménos 40% di e bishitantenan a bini pa promé biaha. Impreshonante ta ku 25% di e bishitantenan anteriormente a bishitá nos isla pa entre dos i sinku biaha. Entre e bishitantenan merikano tin algun estado ku a yama atenshon pa motibu ku nan ta duna un aporte grandi na turismo di Boneiru. Florida, New York, California, Texas, Colorado, Pennsylvania, North Carolina, Virginia, Massachusetts i Georgia a bini dilanti komo e tòp 10 di estadonan for di kua bishitantenan merikano ta bini. Mayoria bishitante hulandes a bini for di e provinsianan den parti nort i parti sùit di Hulanda. Mas aleu tin e gruponan di edat di e bishitantenan di Boneiru, kaminda mayoria di e bishitantenan ta entre 45 i 64 aña.
E industria krusero tambe a aportá na e paisahe turístiko di Boneiru, ku vários barku krusero ku a bishitá nos isla den e promé mitar di aña 2023. Na luna di yanüari a yama bon biní na 28 barku krusero ku en total 70.256 pasahero, siguí pa 29 barku krusero na luna di febrüari ku 74.863 pasahero i 29 barku krusero na luna di mart ku 67.625 pasahero. Na luna di aprel tabatin 16 barku krusero ku 41.465 pasahero i na luna di mei 6 barku krusero ku 21.493 pasahero. Lo prosesá tantu luna di yüni komo e temporada krusero binidero riba e wèpsait www.bonaire.portcall.com.
Pa informashon i estadístikanan mas detayá bo por tuma kontakto ku nos via marketing@bonaireisland.com i bo por bishitá tambe www.bonaireisland.com.
1 comment
[…] Source link […]