Diversificacion Latino America a conduci na un crecemento anual di 5% for di 2011 pa 2019
“Awe ta yena mi di orguyo pa ta parti di e vuelo inaugural di e ruta directo di Cali – Aruba – Cali” tawata palabrananan di Ronella Croes den nomber di Aruba Tourism Authority, na yegada di e vuelo di Wingo cu a aterisa na Aeropuerto Internacional Reina Beatrix for di Cali.
A.T.A. a bin ta traha di manera constante y consistente riba e strategia di diversificacion di e mercado primario, enfocando den diferente mercado. Resultado di esaki ta cu e mercado di Latino America a crece anualmente cu un promedio di 5% di 2011 te cu 2019, sin conta e mercado Venezolano.
E strategia di diversificacion di mercado no ta solamente pa diversifica turismo for di Merca, sino tambe pa sigui crece y saca e maximo potencial for di cada un di e regionnan caminda cu Aruba ta presente, buscando pa conecta mas ciudad importante cu nos isla.
“E tipo di iniciativanan aki ta stimula Colombianonan pa eligi nos destino, Aruba, pa bin pasa nan vakantie. E ruta nobo aki lo permiti residentenan di Cali pa bishita nos isla feliz di un manera directo, asina aportando na e diversificacion di e mercado Colombiano – e mercado mas importante di Latino America cu cual recientemente nos a celebra 40 aña di laso turistico” Croes a continua bisando durante su discurso.
Pa loke ta trata e cifranan di crecemento, Aruba tin como obhetivo pa yega un total di 37 mil pasahero cu un crecemento di 17% compara cu 2019 den un scenario conservador. Sinembargo, A.T.A. a proyecta un scenario optimista tambe caminda mas di 45 mil pasahero lo bishita Aruba, resultando den un crecemento di 40% compara cu 2019. Te cu luna di mei 2023, Aruba a recupera 7% compara cu 2019 di manera global. E mercado Colombiano a recupera cu 24% compara cu 2019. E crecemento ta danki na e esfuerso di promocionnan turistico di A.T.A. y socionan den negoshi, manera Wingo. Tuma nota cu A.T.A. ta tene cuenta cu trafico etnico y ta consciente di e trafico aki y ta midi resultado a base di ‘turista’ cu ta atrae.
“Nos ta sinti nos hopi honra cu Wingo ta parti di e grupo aki cu a confia den nos producto y a permiti nos conecta cada biaha mas Colombia cu Aruba, asina ofreciendo biaheronan alternativanan nobo pa yega nos isla feliz. Nos ta specialmente honra di ta e unico destino cu a ricibi vuelonan adicional na e momento aki. Esaki ta demostra cu Wingo ta kere den nos destino.” Croes a expresa.
Actualmente Wingo ta conta cu tres ruta directo pa Aruba. E rutanan di Bogota y Medellin a percura pa transporta 41% di e total di pasahero for di Colombia pa Aruba te cu mei 2023. Ta premira cu e ruta adicional for di Cali lo percura pa un aumento den e procentahe aki y lo sigui fortifica e relacion comercial y turistico entre Colombia y Aruba.
A.T.A. ta gradici socionan di Wingo pa nan confiansa den nos isla, na Gobierno di Aruba pa kere den e vision di diversficacion di A.T.A., y e ekipo di AAA pa tur nan esfuerso pa haci di rutanan nobo un realidad, como tambe departamento di Imigracion y otro autoridadnan. Tambe ta gradici e ekipo di A.T.A. Latino America y Aruba pa tur nan trabou cu ta aporta na e meta aki.
