Ex Minister di Antias Glenda Richardson : Conscientisacion riba sclavitud mester por drenta scolnan na Hulanda y na e islanan den Reino den Caribe

Doctorandus Glenda Richardson ex minister di antias di Saba y Statia ta un Arubiano cu ta biba na St Maarten, actualmente ta pensionado, pero ta traha ainda mirando cu e ta gusta traha. Actualmente sra. Richardson ta traha como tolk den corte di husticia y ta na Aruba pa haci esaki.

Banda di cu sra. Richardson a bin traha e la forma parti di diferente lecturanan cu ta tuma luga di sclavitud y ta hopi interesa riba e consecuencianan di sclavitud cu no ta solamente cu nos recurso humano a wordo exporta, pero tambe den hopi di e paisnan di Hulanda tambe e recurso di tera a wordo exporta y un di e consecuencianan ta cu e islanan a bira hopi pober a consecuencia di sclavitud, pero mentalmente y hasta fisicamente ta hunga un rol den e parti aki.

Segun Sra. Richardson awendia estudionan cu a wordo haci cu a mustra cu  a consecuencia di sclavitud  nos hende nan ta sufri di presion halto y diabetico, esakinan ta aspectonan cu nos mester tene cuenta cu ne debi cu tin mas cos y e no ta solamente sclavitud, pero e tin hopi consecuencianan pa hopi generacionnan cu a bin despues di sclavitud.

Dia prome minister di Hulanda Mark Rutte a pidi disculpa ta kere cu e ta un paso den e direccion corecto. E prome paso ta pa reconoce cu bo hendenan di e tempo aya a haci malo contra di otro hende cu ta forma parti di Reino Hulandes. Sra. Richardson ta kere cu e ta un bon paso debi cu antes hopi hende tabata papia cu e tabata un cos di pasado y laga cos para, pero awe por mira e diferencia unda cu e ta un comma y no un punto.

Awo combersacionnan mester cuminsa con lo bay haci tur e islanan  y e hende nan den reino consciente riba violacion contra humano di nos hende nan y tambe e consecuencianan cu sclavitud tabatin pa nan cu a bira hopi rico y pa nos cu a bira hopi pober.

Mester traha riba hopi conscientisacion di hendenan di Hulanda unda cu mester drenta den scolnan na Hulanda, pero na e islanan den Caribe tambe. Ta lamenta cu hopi di nos mes un hende nan aki den e islanan den Caribe ta nenga cu nos tabata catibo, specialmente esunnan cu ta un poco colo cla.