Notisia di polis di djárason 28 di yüni te ku 30 di yüni 2023

Papel di dollar merikano falsifiká
Riba djárason 28 di yüni Kuerpo Polisial Hulanda Karibense (KPCN) a risibí notifikashon di papel di dollar merikano falsifiká. A entrega e sèn di papel falsifiká na polis i a inisiá un investigashon. 

Detenshon pa maltrato ku arma

Riba djárason 28 di yüni a detené un dama di inisial C.M.D.P. di 45 aña di edat en konekshon ku un kaso di maltrato ku un arma i intento di asesinato. E dama ta sospechoso di a maltratá un otro dama ku un arma blanku riba djaweps 1 di yüni. E kaso ta bou di investigashon.

Detenshon pa maltrato, menasa i destrukshon 

Riba djárason 28 di yüni a detené un hòmber di inisial A.S.S. di 34 aña di edat en konekshon ku maltrato, menasa i destrukshon. Riba e dia aki e hòmber ta sospechoso di a maltratá un dama i kibra glas di un outo riba Kaminda Gurubu. E kaso ta bou di investigashon.

Kòntròl di konsumo di alkohòl

Den oranan di mardugá riba djaweps 29 di yüni, Kuerpo Polisial Hulanda Karibense (KPCN) a tene un kòntròl di konsumo di alkohòl riba Kaya Hermandad i na diferente sitio riba Boneiru. Durante di e kòntròl a kontrolá 25 shofùr di outo i 17 shofùr di skuter riba uso di alkohòl ku un tèst di supla. E tèst ta mustra si un persona a konsumí mas alkohòl ku lei ta permití si bo ta manehá un vehíkulo. Durante ku a tene e kontròl di tráfiko, a detené 6 persona pa manehá bou di influensia. Ta trata di un hòmber di inisial C.F.H.A. di 23 aña di edat, un hòmber di inisial G.A.E.A. di 29 aña di edat, un dama di inisial V.M.J.B. di 19 aña di edat, un dama di inisial D.B.M.G. di 18 aña di edat i un hòmber di inisial N.O.E.D.V. di 40 aña di edat. Durante e kòntròl a tou un outo ku tabata mal stashoná riba Kaya Hermandad i a duna 3 prosèsferbal pa manehá sin reibeweis bálido. 

KPCN ke hala atenshon di un i tur pa konsumí alkohòl ku límite si bo ta partisipá den tráfiko. Asina bo ta prevení situashon nan peligroso pa bo mes i pa otronan. Kore un vehíkulo bou di influensia di alkohòl ta un delito. Si bo sa ku bo ta bai sali i probablemente lo disidí di bebe mas alkohòl di e kantidat permití pa manehá, traha sita ku un persona ku por hiba bo kas seif. Bo ta manehá bou di influensia di alkohòl? E ora ei bo por haña un but, un prohibishon (temporal) pa manehá, por tuma bo reibeweis den beslag, un kastigu di prizòn òf un kombinashon di e kastigunan aki. E peso di e kastigu ta dependé di e seriedat di e situashon. 

Kada shofùr den tráfiko ta responsabel pa nan mes, e okupantenan pero tambe sobra hendenan rondó di dje. Un persona alertá, ta konta pa dos!

Detenshon pa manehá bou di influensia di alkohòl
Riba djaweps 29 di yüni alrededor di 3.45 or di mardugá un patruya di polis a spòt un vehíkulo ku tabata kore riba un velosidat haltu riba Kaya Julio A. Abraham. E patruya di polis a duna e shofùr un señal pa para pa un kòntròl. Durante e kòntròl polis a konstatá ku e shofùr probablemente tabata bou di influensia di alkohòl i despues di e tèst di supla esaki a resultá di ta e kaso. A detené e shofùr, un hòmber di 48 aña di edat di inisial B.T.T.. 

Detenshon pa maltrato pisá

Riba djabièrnè 30 di yüni, alrededor di 2 or di mardugá, a detené un hòmber di inisial G.F.G.G. di 45 aña di edat en konekshon ku un kaso di maltrato pisá. E sospechoso tabata enbolbí den un bringamentu ku maltrato pisá na altura di un establesementu nokturno riba djasabra 24 di yüni.