“E tombola di bida”
Sekshon di Kultura, Arte i Literatura (SKAL) i Komishon Di Luna Yen ta kontinuá ku aktividatnan segun su kalènder kultural. Riba djaluna 3 yüli 2023 lo tin e evento ‘E Anochi Ku Luna Yen’ di 7or pa 9or di anochi na kunuku di Popo Morales den Mexico na Antriol pariba.
E tema di e anochi ta “E tombola di bida”.
Un anochi ku poesia bou di e luna yen. Anochi ku Luna Yen ta un evento sosial di pueblo i pa pueblo, pues un i tur ta kordialmente bonbiní.
Personanan di Rincon ku tin mester di transporte por hasi uso di un bus ku ta sali for di pariba di misa 18:00-or rumbo pa Playa, e mesun bus aki ta pasa na ofisina di SKAL pa rekohé e personanan di Playa. Ta pidi tur esnan ku ke hasi uso di e servisio di transporte pa hasi reservashon na tempu na SKAL of yama +599 715 5323. Di e forma aki nos por hiba un mihó komunikashon ku otro.
Manera semper, ta keda liber na kada bishitante pa trese algu di boka dushi pa kompartí ku otro bishitantenan i un súplika pa tur hende bini ku nan propio stul. No neglishá bo kapasidat i bin demostrá ku bo por. Nos ta apresiá i respetá tur obra, ku eksepshon di palabranan bulgar, polítika, problemanan personal i tur loke ku no ta kuadra ku e meta di e evento.
Anochi ku Luna Yen ta un inisiativa ku a nase den pasado for di algun siudadano ku gran pashon pa nos idioma papiamentu. SKAL ta keda pone énfasis ku meta prinsipal di e evento pa stimulá otro pa skirbi, deklamá, konta storia, kanta òf presentá obranan kòrtiku na papiamentu.