“Independisacion di nos colegionan halto ta necesario pa asina por duna conseho y veredictonan obhetivo cu lo yuda democracia di nos pais”
Fortificacion di Estado di Derecho ta hopi importante pa un pais. Y como pais, Aruba tin algun colegio halto di estado cu ta esunnan cu ta garantisa democracio di nos pais. Tur gobernacion mester tin nan colegionan halto di estado ekipa cu tur herment necesario pa haci e trabou cu nan mester haci. Organo Consultativo, Raad van Advies (RvA) ta un di e colegionan halto di estado. Y awo e ta wordo independisa. Raad van Advies ta e organo cu ta duna conseho na Gobierno y Parlamento riba tur ley cu mester pasa den Parlamento. Tanto Gobierno como Parlamento semper mester di conseho of veredicto di un Raad van Advies independiente.
Prome Minister Evelyn Wever-Croes a remarca cu desde el a drenta gobernacion, el a cuminsa cu e proceso di independisa Raad van Advies, Algemene Rekenkamer y di Parlamento. Independisacion di nos colegionan halto ta necesario pa asina nan no depende di Gobierno y por duna conseho y veredictonan obhetivo cu lo yuda democracia di nos pais.
E leynan necesario pa haci Raad van Advies independiente a wordo pasa caba y dialuna mainta un protocol a wordo firma entre Raad van Advies, Directie Financiën, Departamento di Recurso Humano y Gobierno pa independisacion di Raad van Advies y con pa duna contenido na esaki. Raad van Advies por busca e personal cu e tin mester cu ta cualifica y e proceso aki no mester pasa via Gobierno mas. Tambe Raad van Advies mes lo maneha e presupuesto cu e ta haya anualmente den e presupuesto di Gobierno di Aruba cu ta pasa Parlamento.
“Mi ta felicita Raad van Advies cu e paso grandi aki pasobra awo realmente nan por considera nan mes independiente di Gobierno di Aruba. Danki na Directie Financiën y Departamento di Recurso Humano cu a yuda den e proceso aki”, Prome Minister a indica.
Desde cu Prome Minister a drenta den Gobierno, el a institui e comision ‘Commisssie Versterking Democratisch Bestel. E comision aki a haci trabounan hopi grandi pa asina awe por independisa Raad van Advies. Tambe nan a haci e trabou preparatorio caba pa Ombudsman. Esaki tambe ta un proceso y ehecucion independiente di Gobierno di Aruba.
Siguientemente, Prome Minister a remarca, lo sigui traha riba independisacion di Parlamento y di Controlaria General (Algemene Rekenkamer, ARA) pa asina nan no depende riba e maneho di Gobierno den entre otro busca nan personal y e maneho di e fondonan cu nan ta haya anualmente den e presupuesto di Gobierno.
“Esakinan ta pasonan grandi y esfuersonan ta wordo haci pa den e periodo di gobernacion aki ainda, tur Colegio Halto di Estado keda independisa pa garantisa democracia. Ora cu Gabinete Wever-Croes a cuminsa goberna, Controlaria General no tawata tin miembronan suficiente pa saca raport. Esaki tawata un forma cu e Gobierno anterior tawata uza pa pueblo no haya sa e berdad. Y asina, door di no nombra miembronan nobo, e raport Bo Aruba, cu e tempo ey tawata cla pa saca, a keda scondi pa pueblo. E raport Bo Aruba a mustra cuanto biyonnan di florin e Gobierno Eman I y II a malgasta den proyectonan di infrastructura
Una bes cu nos a drenta Gobieno, nos a nombra miembronan nobo y e raportnan ta saliendo. Esey ta nos compromiso cu e pueblo di Aruba,” Prome Minister Evelyn Wever-Croes a enfatisa.
Pabien Raad van Advies!
Comunicado Prome Minister Evelyn Wever-Croes
