Tourism Corporation Bonaire (TCB) ta orguyoso di por duna rekonosementu na Tirzo Thomas, Jonathan Paulina, Pepe Mastropaolo, Dirk Blaas, Tanya Deen i Agnes Joosten pa nan hospitalidat i dedikashon eksepshonal na industria di turismo di Boneiru. Komo parti di e programa hopi apresiá di Bonaire Friends, e personanan akí a hasi un impakto duradero riba nos bishitantenan i nan a duna un aporte konsiderabel na e sektor turístiko di nos isla.
Pa mas ku 20 aña kaba Tirzo Thomas ta un parti integral di nos industria di turismo, kaminda e ta ofresé servisio eksepshonal na Rum Runners. Su karakter kariñoso i servisial, den kombinashon ku su konosementu profundo di nos isla, ta sòru pa nos bishitantenan tin un eksperensia inolvidabel.
Jonathan Paulina, ku ta traha na Belnem House, ta haña elogio pa su mente habrí, su servisialidat i su aktitut positivo. No opstante e echo ku el a nase na Kòrsou, nos bishitantenan ta konsider’é komo un boneriano, pa motibu di su amor pa nos isla i su dedikashon pa hasi estadia di nos bishitantenan na nos isla mas plasentero posibel.
Pepe Mastropaolo, Dive Operations Manager na Great Adventures Bonaire, ta haña elogio pa su amabilidat, sinseridat, rèspèt i generosidat. El a hunga un ròl krusial na momentu di kumpli ku deseo sinsero di un famia pa plama restunan di nan esposo defuntu riba laman. Huntu ku Alfonso, un divemaster i kapitan hopi kerí, Pepe ta un ehèmpel di e karakter kaluroso i kariñoso pa kua Boneiru ta konosí.
Dirk Blaas, un bartènder ekselente na Rum Runners, ta hasi impreshon riba nos bishitantenan pa motibu di su konosementu amplio di bibida i su personalidat ekstravertido i grasioso. Su profeshonalidat i su servisio ekselente a hasi un impreshon duradero riba nos wéspetnan, di manera ku nan tin un eksperensia inolvidabel.
Tanya Deen, di InfoBonaire, ta hunga un ròl importante na momentu di duna informashon konfiabel i asina sòru pa trankilidat di mente serka bishitantenan ku ta planiando nan biahe pa Boneiru. Su manera di aktua kariñoso i servisial, huntu ku su tesoro na konosementu, a hasi e proseso di planifikashon mas simpel pa hopi bishitante, di manera ku nan ta sigur di nan mes i entusiasmá tokante nan bishita na Boneiru.
Agnes Joosten, un empleado dediká na Multishop, un tienda lokal di arte i regalo, ta risibí rekonosementu pa su dedikashon i sosten eksepshonal. Konstantemente e ta hasi tur loke ta na su alkanse pa yuda tur hende i e ta brinda amabilidat i yudansa, no opstante su otro responsabilidatnan. E dedikashon di Agnes pa dunamentu di servisio ekselente a hasié kerí serka hopi hende i ta demostrá e espíritu berdadero di e hospitalidat boneriano.
TCB ta felisitá Tirzo Thomas, Jonathan Paulina, Pepe Mastropaolo, Dirk Blaas, Tanya Deen i Agnes Joosten ku nan ekselente aporte na industria di turismo di Boneiru. Nan hospitalidat i dedikashon eksepshonal ta sirbi komo inspirashon pa otronan i ta personifiká e espíritu hospitalario i inklusivo di nos isla.
E programa di Bonaire Friends ta sigui tira lus riba personanan remarkabel ku ta hasi di Boneiru un destinashon realmente spesial. Nos ta enkurashá bishitantenan pa kompartí nan storianan, potrètnan òf videonan di enkuentronan eksepshonal ku nos komunidat lokal via e página spesial di Bonaire Friends riba https://bonaireisland.com/bonaire-friends/.
Tur siman TCB ta selektá personanan meritorio pa risibí e kondekorashon prestigioso akí, ku kua ta enfatisá e hospitalidat kaluroso i servisio ekselente di Boneiru su habitantenan mas ainda. E programa di Bonaire Friends ta un prueba di e kultura bibu di nos isla i e ta invitá nos bishitantenan pa drenta den kontakto ku nos poblashon lokal i sera amistatnan duradero.
