E siman aki ta organisá pa promé bes na Bonaire e evento “Pride”. Mi lo ke hasi uso di e oportunidat aki pa aportá na nos komunidat ku un pida enseñansa enkuanto Derechinan Humano.
Derechinan Humano ta e base pa dignidat i igualdat di kada individuo. Ta derechinan universal konsagrá den tratado- i normanan internashonal, garantisá pa gobièrnu na tur siudadano, independiente rasa, sekso, religion, opinion polítiko, orientashon seksual o otro faktornan.
E derechonan humano ta protehá libertat fundamental nesesario pa un bida pleno, manera derechi di libertat di ekspreshon, asosashon i religion, derechi di enseñansa i trabou, i e derechi di bida i su debido proseso.
Ora un òf mas hende ta sinti nan diskriminá o oprimí, nan por ekspresá nan mes o resistí, loke lo generá disturbio i konflikto polítiko. P’esei rèspèt pa i protekshon di e derechinan humano ta krusial pa promové hustisia sosial i stabilidat polítiko.
Ademas, e protekshon di derechinan humano ta hunga un papel importante tambe den e desaroyo di un sosiedat. Si personanan por ehersé nan derechi, e ta motivá nan pa partisipá plenamente i kontribuí na e sosiedat. Esaki ta permití personanan krese ekonómikamente i sosialmente, i e sosiedat den su totalidat por alkansá mas prosperidat.
P’esei ta importante pa gobièrnunan traha aktivamente pa kuida i protehá e derechinan humano. Esaki por hasi esaki pa medio di leglislashon, polítika i programanan dirigí na implementashon i protekshon di e derechinan humano. Tin ku krea konsientisashon i ofresé enseñansa; hasiendo esaki nos por kontribuí na un sosiedat den kua nos ta respetá i garantisá e derechinan humano.
Tur hende tin derechi. E derechinan aki ta destiná pa protehá nos di hendenan ku ke hasi nos daño, pero tambe pa yuda nos traha huntu i biba na pas. Total tin 30 derechi deskribí den e Deklarashon Universal di Derechinan Humano, un dokumento firmá pa Nashonnan Uní na 1948. Nashonnan Uní ta fundá na 1945, hustu despues di fin di Segundo Guera Mundial, ku e ophetivo pa logra i mantené pas na mundu. Awe, kasi 200 pais ta miembro di Nashonnan Uni. E derechinan abreviá i simplifiká ta lo siguiente:
1)Nos tur ta nase liber i igual.
2) No ta diskriminá pa ningun motibu.
3) Derechi di bida i biba den libertat i siguridat.
4) Nada di sklabitut.
5) Nada di tortura.
6) Bo tin derechi unda ku bo bai: nos tur ta meskos.
7) Nos tur ta igual pa lei.
8) Lei ta protehá derechinan humano.
9) No por sera nos inhustu.
10) Derechi di hustisia públiko.
11) Nos ta inosente a ménos ku proba kontrario.
12) Derechi di tin privasidat.
13) Libertat pa bai kaminda nos ke den nos propio pais i di biaha segun nos deseo.
14) E derechi di tin un sitio di biba safe.
15) Derechi di tin un nashonalidat.
16) Tur adulto tin mesun derechi di kasa i forma un famia si e ta deseá esaki. Hòmber i muhé tin mesun derecho, kasá òf nò.
17) Derechi di tin propiedat.
18) Libertat di pensamentu.
19) Libertat di ekspreshon.
20) Derechi pa reuní públikamente.
21) Derechi di demokrasia.
22) Siguridat Sosial.
23) Derechi di tin un trabou, pa un salario rasonabel i ser miembro di un sindikato.
24) Derechi di deskansá despues di trabou.
25) Alimento i bibienda pa tur hende.
26) Derechi di enseñansa.
27) Derechi di outor.
28) Un mundu hustu i liber pa tur hende por tin e derechinan humano rònt mundu.
29) Responsabilidat.
30) Niun hende ni nada por kita bo derechinan humano fo’i bo.
Resumiendo nos por bisa ku e derechinan humano ta indispensabel pa un sosiedat ku ta basá riba dignidat, igualdat, inklusividat i hustisia. Pues laga nos tur asumí nos responsabilidat pa sigurá ku e derechinan humano ta ser protehé i respetá. Kòrda semper ku nos tur ta igual i komo tal: ban respetá otro i nos mes i demostrá ku sea kua sea e diferensia, nos tur por biba na pas ku otro riba e pida baranka chikitu aki. Bon siman!
1 comment
[…] Source link […]