Minister di Cultura Xiomara Maduro: Dia 1 di juli 2023 ta conmemora 160 aña di abolicion di sclavitud door di Hulanda den e colonianan di Antias Hulandes y Surnam

Den un conferencia di prensa Minister di Cultura Xiomara Maduro hunto Minister di Educacion Endy Croes, Representante di UNOCA Marvin Odor, Director di Archivo Nacional Aruba, Raymond Hernandez y historiado Adi Martis, kende actualmente ta residencia na Hulanda, a brinda informacion riba e historia den cual nos pais ta forma parti di reino pa locual ta e negoshi di sclavitud.  

Historia di sclavitud ta un tema actual den Reino

Minister di Cultura Maduro a trece dilanti cu Historia di sclavitud ta un tema actual den Reino. Dia 1 di juli 2023 ta conmemora 160 aña di abolicion di sclavitud door di Hulanda den e colonianan di Antias Hulandes y Surnam. Sclavitud ta un negoshi cu a trece rikesa, pero tambe hopi tristesa cu a keda acumula dentro di siglonan. Aki na Aruba pa largo tempo e topico no tabata biba den comunidad, masha poco informacion a wordo duna na scolnan den un manera structural. Investigacionnan haci ta demostra cu na Aruba tambe tabatin esclavo. Aunke no den mesun extensidad y intensidad manera riba hopi otro pais den Caribe. Esaki no ta kita cu na Aruba tambe cosnan inhumano tabata tuma luga cu esclavonan. E cantidad di esclavo tabata menos en comparacion cu e otro islanan den Reino. Pero, Aruba tin su historia di sclavitud, un historia unico y propio. Historia a demostra cu Aruba a conoce varios tipo di esclavo, e esclavo indjan, esclavo cora ‘rode slaven’ y tambe e esclavonan transatlantico, e esclavonan di Africa cu a yega Aruba for di Corsou.

Disculpa di Hulanda pa e historia di sclavitud na paisnan den Reino y Surnam 

Na vispera di 1 di juli cu ta conmemora 160 aña di abolicion di sclavitud pero muy principal despues cu dia 19 di december aña pasa, estado Hulandes pa medio di Premier Rutte a ofrece un disculpa pa e historia di sclavitud na paisnan den Reino y Surnam. Premier Rutte a bisa cu no solamente nos ta comparti un pasado, pero tambe un futuro y pa e motibo ey e disculpa ofreci no ta un fin, pero un continuacion ‘we zetten vandaag een komma, geen punt’. Mas y mas ta bin e pregunta con lo sigui bay dilanti. Ta di suma importancia pa hunto como comunidad nos decifra kico lo mester bini despues di e komma. No solamente na conscientisacion pero tambe na investigacion kico ta e razgo cu scalivitud tin den nos comunidadnan di Aruba, Bonaire, Corsou, Sint Maarten y Surnam. Tanto tempo a pasa pero ainda den pensamento di hende, den nan actuacion ainda e razgo ta presente. 

Comision Conscientisacion Sclavitud Aruba

Desde aña pasa a bin ta sinta cu instancianan cu ta trata e topico aki. Pa medio di Minister Maduro a institui un Comision Conscientisacion Sclavitud Aruba, un grupo di trabou cu ta consisti di miembronan di Ministerio di Cultura, Ministerio di Enseñansa y Archivo Nacional di Aruba, y como consehero sr. Luc Alofs. Sr. Alofs ta un profesional cu  a haci hopi investigacion riba e tereno di sclavitud y a skirbi bukinan tocante di sclavitud. Sr. Alofs pa algun aña caba ta participa den varios reunion encuanto e tema di sclavitud cu Hulanda y paisnan Caribense como un ‘stakeholder’ di  Aruba y ta sali na interes di Aruba en cuanto di e tema aki. Meta di e Comision CCSA ta pa conscientisa comunidad di Aruba tocante historia y abolicion di sclavitud na Aruba. E mandatario a enfatisa cu e Comision aki no ta un Comision Nacional. Aruba no conoce un Comision Nacional di sclavitud ainda.

Conmemoracion 160 aña di abolicion di sclavitud door di Hulanda 

Minister Xiomara Maduro a informa cu dia 1 di juli 2023 ta conmemora 160 aña di abolicion di sclavitud door di Hulanda y gobierno di Aruba lo conmemora e fecha historico aki. Den e proximo dianan aki lo duna mas informacion tocante di esaki. Pa e mandatario ta importante pa brinda informacion na nos comunidad tocante historia di nos Pais. Specialmente e parti di e historia di sclavitud aki cu no a wordo conta ainda y cu pa hopi di nos no ta conoci ainda. Segun Miniser Maduro prome cu nos cuminsa cu e trayecto di guia pa yega na un trayecto di restaura, recupera y reconcilia nos mester conscientisa nos comunidad. E meta ta pa conscientisa, educa y informa comunidad di e historia y abolicion di sclavitud na Aruba. Pa por logra esaki lo inicia cu un campaña di conscientisacion na unda lo haci uso di e medionan usual manera corant, radio, television y social media.