Plan Corporativo pa aña 2024 ta den preparacion: Aruba Tourism Authority fihando metanan turistico pa 2024

Cu bista riba aña 2024, Oficina di Turismo A.T.A. a organisa su Global Marketing Meeting cu a tuma luga di 13 pa 15 di juni. E reunion aki a conta cu participacion di miembronan di ekipo di A.T.A. di Norte America, Latino America, Europa y Aruba. 

E Global Marketing Meeting ta un reunion cu ta tuma luga anualmente y ta fungi como e fundeshi pa e Plan Corporativo y cu esey metanan di A.T.A., y pues pa Aruba su turismo, pa e siguiente aña. 

E obhetivo di e reunion ta pa concretisa e direccion strategico, traha un presupuesto y determina e resultadonan desea pa aña 2024. A.T.A. ta uza e sesion pa update metanan cu ta defini como parti di su plan multi-anual y ta fiha metanan nobo. 

Durante e prome dia di reunion, a dedica tempo y atencion na e posicion di Aruba, tanto for di punto di bista di ‘branding’ como tambe producto turistico. A evalua oportunidadnan existente pa fortifica conocemento, posicionamento y percepcion di Aruba. Tambe a toca temanan manera inventario di cambernan di hotel, otro tipo di acomodacion, tendencianan den mercado turistico, desaroyonan riba nos isla, como tambe den e area di Caribe y na paisnan competidor. 

Directornan di cada area a duna un presentacion tocante e perspectiva pa 2023 y a presenta nan metanan pa cada mercado pa aña 2024. Esakinan ta basa entre otro riba e cantidad di vuelonan y asientonan disponibel, factornan interno y externo, strategia di diversificacion y costo di adkisicion. Tambe a indica si tin mercadonan nobo pa acerca y fondonan necesario pa logra esaki. 

Durante e di dos dia di reunion a pone enfasis riba e tema di ‘niche marketing’ pa aña 2024. Niche marketing ta e concepto di promociona y bende productonan of servicionan existente cu ta satisface necesidadnan specifico. Ya pa algun aña caba, Aruba ta pone enfoke specifico den e areanan di boda, salud y bienestar, cultura, gastronomia, naturalesa y turismo eco-consciente. Pa medio di diferente ehercicio, a bin cu ideanan nobo con pa incorpora e vision di niche marketing den e strategia di comunicacion pa aña 2024.

Pa toca riba e temanan ariba menciona a conta cu presentacionnan di Gilliany Oduber di Ritz Carlton Aruba, Edjean Semeleer di Go Cultura Foundation, Renwick Heronimo di Fundacion Museo Arubano, Gea Sougé di Gea Sougé Nature & Life Coaching, Kimberly Rooijakkers di Boardwalk Boutique Hotel Aruba, Urvin Croes di Infini Aruba y tambe Tyson Lopez y Edeline Berg di Fundacion Parke Nacional Aruba. 

E di tres dia di reunion a trata e tema di canalnan di distribucion y a evalua datonan colecta pa asina por yega na e ‘global lead generation strategy’ – esta e meta pa genera mas interes y ‘leads’ cerca posibel bishitantenan. Cu esaki por sigui traha riba e ‘roadmap’ y plan di mercadeo digital pa 2024, cu tambe lo forma parti di e Plan Corporativo hunto cu su presupuesto. 

Finalmente a establece asina yama ‘key performance indicators’ (KPIs) cu ta e indicadornan cu lo midi e exito di cada iniciativa y esfuerso. Esaki ta ya caba integral den locual A.T.A. ta haci, pero a revisa esakinan.  

Miembronan di ekipo di A.T.A. a participa cu entusiasmo durante e sesionnan di e Global Marketing Meeting y ta comprometi pa traha hunto y realisa e vision pa futuro. 

Na final di dia, e trabou di A.T.A. no ta solamente pa promove e producto turistico, sino tambe pa crea experiencianan inolvidabel sigurando crecemento duradero pa Aruba, di manera sostenibel.