Parlamentario Marco Berlis (MEP): SPCOA ta confirma cu nan ta e unico autoridad pa cera John Wesley College

SPCOA TA E UNICO INSTANCIA AUTORISA PA CERA JWC

Dia 15 di Mei 2023 mi a brinda informacion na pueblo atraves di un articulo di prensa pakico John Wesley College lo mester bay cera su portanan. Mi a haci esaki cu luho di detaye cualnan tur a wordo confirma pa SPCOA mes. Mi ta cuminsa e articulo aki subrayando un di SPCOA su prome frasenan di e articulo cu nan a saca den prensa: “Directiva di SPCOA ta reitira cu e unico instancia autorisa pa tuma e decision pa cera John Wesley College ta directiva di e scol. Nan ta enfatisa cu e decision aki no tawata facil, sinembargo despues di a analisa tur e echonan, no por a haci otro cu tuma e tristo decision pa cera e scol.”

INVESTIGACION HACI

E articulo ta sigui bisa: “E decision di directiva ta basa riba un investigacion valido y di confiansa den cooperacion cu partidonan externo. E investigacion tin tres componente: (1) Na prome luga a constata, investiga y documenta irregularidadnan cu e control di calidad di enseñansa manera ta ancra den ley y maneho di SPCOA. Como ehempel por menciona dos punto di atencion: (1) E maneho di aceptacion na MAVO, (2) Derecho pa forma klasnan. Na di dos luga a investiga e cantidad di alumno na e scol. Manera por wak, e cantidad di alumno a keda baha drasticamente desde aña escolar 2016-2017 te cu awor: Cantidad di alumno riba dia 1 di augustus: 2016- 2017: 227 / 2017-2018: 159 / 2018- 2019: 165 / 2019-2020: 125 / 2020-2021: 119 / 2021-2022: 111 / 2022-2023: 64. Na di (3) tres luga a investiga e finansa y posibilidad pa tene e scol habri cu e tiki alumnonan. Un instituto di enseñansa ta ricibi subsidio for di un normbedrag pa cada alumno y pa e cantidad di local di e edificio di scol. Pa mas cu 7 aña caba JWC tin un caida den cantidad di alumno. Ta calcula subsidio a base di e cantidad di alumno. Ademas, e derecho pa subsidio y formamento di klas ta ancra den ley, kiermen no por desvia di esaki. Menos alumno kiermen menos subisidio pero no menos gasto.”

MIKE EMAN MALINFORMANDO Y GAÑANDO PUEBLO ATROBE.

Como Parlamentario y representante di pueblo e ta hopi importante pa keda informa nos mes cu e berdad di e preocupacionan cu ta surgi den pueblo. Sinembargo, nos por nota cu sr.Mike Eman, un hurista, un ex-minister presidente, un Parlamentario, un persona cu experiencia kier pretende cu ta gobierno su falta cu JWC tin cu cera. Sr. Eman ta hungando cu sentimiento di pueblo malinformando a proposito pa ganashi politico. Esaki nos ta yama “Politrics Comun di Eman.” Pesey, mester corda cu:

(1)-Mayornan ta dicidi cual scol ta manda su yiu. Si nan ta prefera otro scol esaki ta nan derecho.

(2)-JWC ta pidi AFL 700 pa aña scolar. Otro scolnan ta cobra hopi menos. No tur hende por paga esaki.

(3)-CBS a premira esaki, pasobra poblacion ta traha menos yiu. No tin suficiente mucha pa tur scol.

SPCOA A PAGA E BELA Y MANIFESTACION DI MENTIRA COMUN DI MIKE EMAN

Mi a tuma nota di e manifestacion dia 15 di Juni cu AVP a organisa. AVP, un partido den crisis, cu a wordo califica pa tres ex-miembro y dos parlamentario independiente awor como un partido corupto, mentiroso y cu politica di ‘Old Boys Network’, ta trata na drecha su imagen y kita atencion di e sla duro cu nan a haya recientemente. Asina mes Mike Eman den su desesperacion ta insisti pa keda instiga pueblo cu e mesun strategianan di old boys y gañamento contra gobierno. Pueblo mes por a wak con tur informacion a bin ta bisando mescos: “No ta falta di gobierno cu JWC ta cera su portanan.” Mike Eman kier mantene portanan di JWC habri basa riba promesa falso y incorecto. Ta bon pa remarca si cu mes a “paga bela” di su propio negoshinan EMCO y Interbank, a paga e bela di su propio partido cu ta celebrando y brasando corupcion, y riba dje Mike Eman a paga e bela di Aruba financieramente cu un megadebe y awor kier sende bela pa JWC? E gañamento comun aki di Mike Eman ta e “bon comun” cu ta papiando di dje? Politrics ta Mike Eman su expresion di e “bon comun”? 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!