Entidat Públiko Boneiru a tuma nota di inventarisashon di e situashon aktual di dunamentu di pèrmit i supervishon i mantenshon di lei

Dunamentu di Pèrmit i Supervishon i Mantenshon di Lei na Entidat Públiko Boneiru mester mehorá hopi mas. Esaki ta e konklushon duru di Inspekshon di Ambiente di Biba i Transporte  (Inspectie Leefomgeving en Transport – ILT) den su rapòrt: ‘Inventarisashon di e situashon aktual di dunamentu di pèrmit i supervishon i mantenshon di lei di parti di Entidat Públiko Boneiru.’ Na Hulanda ku regularidat nan ta hasi e tipo di inventarisashonnan akí serka e servisionan ku ta ehekutá tarea di dunamentu di pèrmit i supervishon i mantenshon di lei. E inventarisashon akí ta un promé evaluashon pa Boneiru pa yega na un tarea klarito pa Dunamentu di Pèrmit i Supervishon i Mantenshon di Lei. Na luna di òktober aña pasá gezaghèber pa pidi pa un investigashon asina.

E konklushonnan di Inspekshon di Ambiente di Biba i Transporte ta klarito: dunamentu di servisio di Entidat Públiko Boneiru mester ta mas transparente i mester mehorá konsiderabelmente. Mester evitá intervenshon di polítika ku ehekushon, ku no ta bai segun regla. Esaki ta na interes di nos isla i di habitantenan di Boneiru, di manera ku ta trata kasonan igual den un forma igual tambe. Banda di esaki mester tuma desishon na tempu riba un petishon pa un pèrmit. Mester yena kuadronan di maneho ku falta na tempu, di manera ku por evaluá un desishon riba un petishon a base di reglanan klarito.

E kousanan importante ta preshon regulatorio ku a oumentá, kresementu eksplosivo di petishon i komplehidat di e failnan. Durante e último añanan a introdusí i sinkronisá hopi legislashon i regulashon nobo di reino, loke ta kondusí na proseso i prosedura nobo. E kantidat di petishon pa un pèrmit tambe a oumentá enormemente. E aparato gubernamental no por a kana pareu ku e kresementu akí. Awor akí mester eliminá e retrasonan den ekspertisio i kapasidat akí. 

Kolegio Ehekutivo ta tuma e konklushonnan di e rapòrt di Inspekshon di Ambiente di Biba i Transporte hopi na serio i ta konsiente di importansia di un toma di desishon i akshon rápido, pa hasi konekshon ku e rapòrt di Inspekshon di Ambiente di Biba i Transporte. Pa e motibu akí ku determinashon i na mes momentu den un forma kuidadoso, Kolegio Ehekutivo lo bai traha riba e rekomendashonnan di e rapòrt. Den e tres lunanan binidero Entidat Públiko Boneiru lo tira un bon bista riba ehekutabilidat di e rekomendashonnan, i elaborá un plan den etapa a base di un perspektiva karibense ku un aserkamentu lokal den estrecho konsulta ku Inspekshon di Ambiente di Biba i Transporte.

Habitantenan i empresarionan di Boneiru tin derecho riba servisionan gubernamental ku ta funshoná bon. Dunamentu di servisio gubernamental na nos isla mester ta konfiabel i ku enfoke riba resultado i fortifikashon di e organisashon i i di maneho ta un kondishon esensial pa esaki. Akí e rekomendashonnan di Inspekshon di Ambiente di Biba i Transporte ta konektá ku e liña ku ya kaba Entidat Públiko Boneiru a kuminsá kuné ku e trayekto di mehorashon pa Dunamentu di Pèrmit i Supervishon i Mantenshon di Lei den forma di un kolaborashon di mas aña, e asina yamá ‘Twinning’, ku munisipio di Breda i Omgevingsdienst Midden en West-Brabant pa profeshonalisá i fortifiká maneho i Supervishon di Mantenshon di Lei di Entidat Públiko Boneiru mas aleu.

Ta na Kolegio Ehekutivo, direktorado i empleadonan pa konhuntamente i den un forma harmonioso tuma akshon. Kolegio Ehekutivo lo supliká sekretario di estado di Infrastruktura i Maneho di Awa pa duna Entidat Públiko Boneiru e tempu nesesario pa esaki. Periódikamente Kolegio Ehekutivo lo informá Konseho Insular tokante e progreso.