Pastor Marcel Balootje: No negocia cu bo curpa, pasobra e no ta di bo

Dios ta doño di tur creacion, pasobra Dios a crea tur cos , diabel no por crea nada, tur locual cu e diabel a haci ta sembra mal simia y corumpi mente di hende riba mundo y asina causa cu hende ta negocia cu e curpa, mente y spirito cu Dios a duna nan.

E ta un gran peliger ora hende rechasa Dios, y cuminsa negocia den inmoralidad, droga, prostitucion etc, pasobra si no bini un arepentimiento profundo, tur cos lo termina cu propio destruccion.

Laga nos cuminsa asina aki: E yiu sabi ta acepta disiplina for di su tata, ma un hacido di bofon no ta haci caso di reprendememto. ( Proverbionan 13:1).

Hende tin e libertad di escohe entre bon y malo, pesey Dios den su misericordia , bondad y amor a mustra e caminda di salbacion na un y tur ( Juan 3;16-18).

Ora hende ta negocia cu nan curpa , nan ta corre peliger 24/7, y e ta asunto mas serio cu hopi hende ta kere.

Boso no sa cu boso ta tempel di Dios, y cu e Spirito di Dios ta biba den boso.Si un hende destrui e tempel di Dios, Dios lo destrui e.Pasobra e tempel di Dios ta santo y esey ta loke boso ta.( 1 Corintionan 3:16).

Awor nos tin di compronde e asunto di aki bon cla, ningun hende por destrui e tempel di Dios celestial, mihor bisa haci daño na cielo.

Pero nos tin di tene debido cuenta kico nos ta haci cu nos curpa aki na tera, pasobra pa motibo di mal comportacion y actitud bergonsoso nos ta cay den man di enemigo, kende su meta principal ta pa destrui hende.

Hende ta bira esclavo di droga, alcohol, inmoralidad, pasion bergonsoso, y di locual ta para scirbi den 2 Timoteo 3:1-5, cual tur ta hiba na destruccion si no bini un arepentimento.

Huy for di inmoralidad, Tur otro pica cu hende comete ta pafor di e curpa, ma e hende inmoral ta peca contra su mes curpa. 

Of boso no sa cu boso curpa ta e tempel di Spirito Santo. Kende ta den boso. Kende boso tin di Dios, y cu boso no ta pertenece na boso mes.

 Pasobra boso a wordo cumpra pa un preis , Pesey glorifica Dios den boso curpa.( 1 Corintionan 6:19).

Ora un hende ta negocia den pica cu su curpa, e persona aki a rechasa e salbacion di nos Señor Cristo Hesus, y na mes un momento tambe a rechasa e Spirito santo di Dios, pasobra e Spirito santo di Dios ta puro y santo.

Pa medio di esaki nos por compronde cu ta nos deber pa predica e evangelio tur dia na tur criatura, pasobra hopi no sa e peliger cu nan ta corre, pero mas tristo ta, esnan cu ta haci bofon pa nan sigi den nan bagamunderia y inmoralidad.

Esun cu ta uni su mes cu Señor ta un Spirito cun’E. ( 1 Corintionan 6:17).

Ta tempo pa mayornan uni den oracion den cada bario,den cada hogar , den nomber di Cristo Hesus,pasobra e diabel ta hambra tras di e hubentud den tur forma. Y tur cos ta cuminsa na cas, caminda muchanan mester wordo educa pa nan no negocia cu nan curpa pasobra e curpa no ta di nan.

Laga nos reconoce cu Señor e ta Dios.E ta Esun cu a traha nos, y no ta nos a traha nos mes. Nos ta su pueblo y e carnenan cu E ta pastorea.( Salmo 100:3).