“Art & Science Fair” di Maria College a expone talento di hobennan

“Pabien Maria College Mavo cu un tremendo evento”

Maria College Mavo recientemente a organisa un “Art and Science Fair” den cual alumnonan di e scol a expone nan talento den ramo di ciencia, proyectonan di arte y di baile. Prome Minister Evelyn Wever – Croes a asisiti e evento y a keda impresiona cu tur locual cu e hobennan a presenta. 

Prome Minister Wever – Croes a expresa cu e exposicion di proyectonan di ciencia tabata sumamente interesante y tur locual cu nan a presenta tabata impresionante. ‘Ta mira cu nos hobennan ta hopi envolvi den asuntonan di medio ambiente y desaroyo sostenibel.’ E exposicion di arte tambe a laga Prome Minister totalamente sorprendi. Tabatin bunita obranan di arte entre otro cuadronan bunita cual algun tabata na benta. 

Prome Minister ta aplaudi Maria College pa a organisa e evento aki y asina stimula hobennan pa expone nan talento y loke nan por haci cual ta muestra di locual cu bo por logra ora cu bo ta determina y dedica na locual cu bo gusta. 

Finalisando, Prome Minister a expresa cu e evento aki por sirbi como ehempel cu otro scolnan por uza, paso nos hobennan tin hopi talento. “Pabien na tur alumnonan y Maria College Mavo cu e bunita Art and Science Fair.”