Pastor Marcel Balootje: Sin arepentimento no tin pordon di pica

Dios den su inmenso amor ta adverti tur hende, pa despues ningun hende no bisa cu nan, no tabata sa:

Pasobra pago di pica ta morto, ma e don di gracia di Dios, ta bida eterno den Cristo Hesus, nos Señor.

(Romanonan 6:23)

Esun cu ta sconde su picanan lo no prospera,ma esun cu ta confesa y laga nan lo haña misericordia (Proverbionan 28:13).

Si Mi no a bin y a papia cu nan, nan lo no tabatin pica,ma awor nan no tin disculpa pa nan pica.( Juan 15:22).

Nos tin cu educa nos yuinan pa nan hala leu for di maldad, no asocia cu hende cu ta biba den scuridad di mentira y inmoralidad, parandiamento, bebemento constant ,violensia , canamento cu arma, rebeldia contra mayornan, e persona ey por tin tur cos , pero su curason ta leu for di Dios.

Dios ta un Dios husto. 

Y tur dia Dios ta rabia cu e malbado.

Si un hende no arepenti.

E lo mula su spada.

E a span su boog y pone cla.

Tambe e a prepara su armanan mortal.

E ta prepara su flechanan, ardiente pa su persiguidornan.

Ata e ta dolor di parto di inikidad, e ta concebi perversidad y ta pari falsedad

E a coba un buraco y a hacie hundo, y a cay den e buraco cu e mes a coba. 

Su perversidad lo bolbe riba su cabes.

Y su violencia lo baha riba corona di su mes cabes. ( Salmo 7:12-16).    

Pica no ta cos di celebra ta cos di arepenti di dje, celebramento di pica ta rebeldia contra Dios, ta cherchamento di Dios, y nos tur sa cu Dios no ta laga ningun hende haci bofon di dj’E, tur locual hende sembra esey tambe nan lo cosecha ( Galationan 6:7).

Pasobra e furia di Dios, ta keda revela for di cielo contra tur impiedad y inhusticia di hende cu ta oprimi e berdad pa medio di inhusticia.

Pasobra maske nan tabata conoce Dios, na no a honr’E como Dios,ni a duna gradicimento, ma a bira inutil den nan speculacion nan y nan curason bobo a bira scur.

Profesando di ta sabi nan a bira bobo. ( Romanonan 1:18-21-22).

Asina ta pasa cu hende cu no kier arepenti.

Nan ta bira bobo y keda den nan scuridad, y cay bao di e furia di Dios.

Ma pa motibo di bo capricho, y di bo curason cu no kier arepenti, bo ta montona furia pa bo mes,den e dia di furia y revelacion di e huicio husto di Dios.

Kende lo paga cada ken segun nan obranan.( Romanonan 2:5).  

Pesey ningun hende lo no tin excuus, pasobra salbacion ta personal, esun cu kere lo ta salba y esun cu no kere lo bay perdi.

Hende mester tuma e decision di sali urgentemente for di pica, y biba un bida cu ta agrada Dios, percura pa nos ta den boluntad di Dios,y henter nos famia yega na Señor, pasobra si no tin arepentimento no tin entrada pa nos serca Dios. ( Juan 3:36).

Esaki ta un yamada di cinco pa diesdos, pasobra tur dia e mundo ta bay mas atras den scuridad, tin hopi caminda cu abominacion y idolatria a bira cos di celebra, pa hende, pero pa Dios e ta un rechaso completo.

Nos yuinan mester lanta sano den e caminda di Dios, y esey ta nos deber pa percura pa e ta asina.

Nos no por permiti diabel cohe ventaha den nos famia ,como mayor nos mester ta ehempel di arepentimento.