Prome Minister Evelyn Wever-Croes: Gobierno a tuma e decision pa bin cu compensacionnan den e area di derecho di importacion, invoerrechten

Durante conferencia di prensa di Gobierno, Prome Minister Evelyn Wever-Croes a elabora riba e diferente compensacionnan cu gobierno lo introduci pa comunidad di Aruba, na momento cu introduci e BBO na frontera. Manera Prome Minister a menciona anteriormente, IMF a publica un rapport indicando cu inflacion na Aruba ta bahando, pero debi cu e BBO na frontera por causa un inflacion di 0.7%, a tuma e decision di bin cu cierto compensacionnan. 

Na momento cu Gabinete Wever-Croes a drenta gobernacion, semper a bin cu compensacionnan na momento di bin cu decisionnan cu por conduci na cualkier subida den prijs y/of inflacion. E biaha aki a enfoca e compensacionnan den e area di derecho di importacion, di invoerrechten. 

Derecho di importacion (invoerrechten) di varios producto / cuminda ta baha na 0%: Productonan cu lo baha na 0%  na momento di importacion lo ta varios cuminda incluyendo Lechi, yogurt, chocolade melk, lechi di coco, Fruta y berdura frozen, Salmou, tuna fish, sardinchi, Baking powder y binager, Cuminda di cacho y pushi.

Aparatonan di energia limpi ta baha di 2% pa 0%: Aparatonan di energia limpi manera airco inverter, wasmachine, dryer, frigidaire y freezer cu ta uza menos coriente, bombiyo cu ta uza menos coriente y lusnan LED, Molina di biento y panelnan solar, y partsnan cu ta uza energia solar. 

Transporte electrico ta baha di 2% pa 0%: Auto electrico, Step y segways electrico, Bicicleta electrico, Scooter electrico, Brommer electrico.

Derecho di importacion (invoerrechten) di auto ta baha na 32 %: 

• Pa auto cu balor di 30 mil florin – Gasto di impuesto pa e car dealer ta baha cu Afl. 5.400, e gasto di impuesto ta baha cu Afl. 3.300 si bo mes importa e auto (pa propio uzo, no pa bende).
• Pa auto cu balor di 35 mil florin, e gasto di impuesto pa e car dealer ta baha cu Afl. 6.300. Gasto di impuesto ta baha cu Afl. 3.850 si bo mes importa e auto (pa propio uzo, no pa bende).
• Auto cu balor di 50 mil florin, gasto di impuesto pa e car dealer ta baha cu Afl. 9.000. Gasto di impuesto ta baha cu Afl. 5.500 si bo mes importa e auto (pa propio uzo, no pa bende).

Material di construccion ta baha di 10% pa 6%.

Material educativo pa mucha ta baha di 6% pa 0%: Buki pa mucha, Buki di pinta, Buki di prenchi, Atlas.

Articulo di cas ta baha di 12% pa 6%: Articulo pa cushina, Articulo pa baño, Articulo higienico.

Articulonan di baby ta baha di 12% pa 6%: Pampers, Bruki.

Instrumento musical cu lo baha na 12%: Instrumentonan musical manera klarinet y trompet lo baha di 22% pa 12%. 

Prome Minister a remarca cu esakinan ta solamente algun ehempel cu derecho di importacion ta bay baha. Ta trahando riba esaki pa asina comunica mas cu comunidad pa asina pone tur hende na haltura di tur loke ta bay baha. Gobierno di Gabinete Wever-Croes ta traha pa bienestar general di pueblo y cu introduccion di e compenascionnan aki, lo alivia un poco e costo di bida pa comunidad.