Minister Rocco Tjon: A ricibi un update di e estudio “The Quality of Life of the Aruban Youth”

Algun tempo atras, a conduci un estudio pa loke ta e calidad di bida di e hobennan di Aruba, y diaranson mainta, a presenta un update di e estudio aki na Minister di Husticia y Asuntonan Social sr. Rocco Tjon y Minister di Enseñansa y Deporte sr. Endy Croes. Un estudio cu ta toca diferente aspecto social, hudicial y di enseñansa. 

Manera ta conoci, den pasado un investigacion piloto a wordo haci bou di algun scol na Aruba, di cual e resultadonan tawata hopi valioso. Pa e motibo aki, den e presupuesto di e aña aki, hunto cu colega Minister Endy Croes, a aproba pa por conduci un investigacion cientifico bou di tur scol na Aruba. Ya caba tin mas di dos mil studiante cu a wordo encuesta bou di 42 scol na Aruba, di cual e intencion ta cu pa prome di december, ricibi e resultadonan preliminario, pa asina adapta nos maneho si ta necesario. 

Segun minister Tjon, Gobierno di Aruba ta kere hopi den “evidence-based policy”, pues e idea ta pa adapta e maneho riba e area di enseñansa, social y hudicial a base di investigacionnan cientifico. E investigacion cientifico titual “the quality of the Aruban youth”, ta toca cuater aspecto cu ta importante pa nos hobennan. E prome aspecto ta e contexto escolar, e di dos ta e contexto familiar, pero tambe e contexto di e bario, cual ta di suma importancia den cuadro di veilige barios. Na mes momento, ta enfoca tambe riba e parti di e “wellbeing” di e hoben; e parti fisico pero tambe e parti di salud mental. 

Despues cu e analisis aki keda cla, tur e resultadonan lo wordo presenta na tur esnan cu a forma parti di e investigacion aki, pa asina por bin cu solucionnan concreto. Importante pa menciona ta cu e investigacion no ta basa solamente riba encuestanan, pero e investigadonan, kende ta e profesionalnan di IPA conhuntamente cu universidad na Hulanda, lo papia cu e directiva di tur e scolnan cu a forma parti di e investigacion aki.  Banda di esaki tin diferente “focusgroups” andando, caminda mayornan di e diferente hobennan aki tambe ta haya e oportunidad pa duna un splicacion mas amplio riba e diferente puntonan cu ta forma parti di e investigacion. 

E mandatario a expresa cu e ta satisfecho di a haya un bista di e avansenan pa loke ta e investigacionnan aki, y pa december lo haya e resultadonan preliminario, pa asina por tene cuenta cu e diferente recomendacionnan cu lo sali afo di esaki pa cu e presupuesto di 2024.