Tur deporte nobo pa keda reconoci como federacion y miembro di coa tin un proceso pa cana prome

Mundo di deporte a crece masha hopi mes na Aruba. Tin diferente deportenan tradicional cu a crece pero na mes momento tin deportenan nobo cu kier lanta y bira oficial na Aruba. Sinembargo pa deportenan nobo keda reconoci como federacion e tin un proceso pa cana y condicionnan cu mester cumpli cu ne prome cu por bira miembro di Comite Olimpico Arubano COA.

Secretaria General di COA Nicole Hoevertsz e proceso ta cuminsa na e base unda cu hendenan ta gusta un deporte y ta cuminsa practica esaki y despues ta sinti cu nan ta desea di bay mas leu y cu kier bay competi. Aki ta caminda cu e proceso ta cuminsa, sea cu un persona mes ta deportista of nan mayornan tabata deportista y ta dicidi cu nan ta scoge un deporte y ta bay practica esaki tambe. Despues di ta practica asina mas hende ta sigui practica e deporte y ta cuminsa forma clubnan y poco poco na momento cu cuminsa haya mas structura den e deporte ta bin e pregunta y e gana pa lanta un federacion.

Na momento cu un tipo di deporte ta un federacion y ta bira miembro di COA of di ASU e federacion ta haya e posibilidad di entrega tur aña un peticion pa subsidio. Esaki ta e motibo pa kico federacionnan ta interesa pa bira miembro di COA of ASU debi como federacion nan por haya acceso pa haya subsidio, pero esey no kiermen cu lo haya e subsidio.

Pa loke ta trata COA e condicionnan ta hopi simpel, segun Secretaria General di COA Nicole Hoevertsz e federacion mester practica activamente un deporte, no por ta posibel cu tin federacionnan fantasma cu no ta desaroya actividadnan, pero cu mester ya caba ta practicando y tin cierto competencianan y ta organisa bo mes den un federacion.

Un federacion ta definicion di un asociacion, dus di ta un unidad (vereneging) y no un fundacion (stichting). Un fundacion ta un forma huridico diferente cu den deporte no ta asina comun, pero den mundo di deporte un asociacion ta mas comun pa motibo cu e deseo na final ta cu e organisacion tin miembro y un fundacion no mag di tin miembro, pesey mes e formato di un fundacion no ta asina apropia pa deporte. Den mundo di deporte hustamente e deseo ta pa e deporte crece y pa e deporte crece mester tin miembro y ta pe e motibo aki mes mayoria biaha e forma huridico di asociacion ta wordo uza.

Un federacion tambe ta un asociacion y den un federacion e miembronan ta e clubnan y ta pe motibo aki mes no ta haya miembronan individual. Sinembargo pa por bira miembro di COA e federacion mester demostra cu ta wordo reconoci door di e federacion internacional. Loke cu mester ta bon cla cu no ta COA ni gobierno ta duna reconocemento pero e federacion internacional ta esun cu ta duna e reconocimento.

Segun Secretaria di COA Nicole Hoevertsz na momento cu e parti aki sosode e ora COA ta sigui.Comite Olimpico Arubano ta wak e federacion internacional y na momento cu un federacion na Aruba haya reconocimento e ora COA ta duna e reconocimento na nivel nacional.

Comite Olimpico Arubano COA ta yuda, guia, acompaña e organisacion pa splica e proceso, pero e statutonan di COA ta bisa cu mester ta un federacion cu ta miembro di un federacion internacional, esaki ta significa cu e federacion internacional ta esun prome cu mester duna e reconocimento y despues COA ta haci e parti local.
Naturalmente COA ta den contacto cu e federacion internacional debi cu na unda cu nan ta estableci no tin bista di loke ta pasa na Aruba, esaki ta pone cu COA lo por duna un poco miho bista unda cu por sa si como federacion nan ta desaroya nan mes riba e nivel di deporte, si ta organisa campeonato y tambe si tin cierto conflictonan.

Den e caso aki pesey hopi biaha ta acerca COA pa intermedia na momento cu tin cierto conflicto, COA ta trata di sinta na mesa y yega na un solucion.
Cada federacion cu wordo lanta mester keda lanta segun statuto di e leynan di Aruba cu recientemente na aña 2021 a cambia cu awendia mester lanta statutonan na notario, antes tabata na departamento huridico di gobierno, pero esaki a cambia. E federacion mester cumpli cu leynan di Aruba y unabes cu e federacion keda lanta ta manda esaki na federacion internacional y nan ta duna e reconocimento.

Loke cu tambe ta hopi importante ta cu na cada pais por tin solamente 1 federacion di cada deporte reconoci door di COA, por tin dos, tres federacion di e mes un deporte, pero COA lo investiga cua ta esun cu lo bay duna reconocimento. Lo mester haci un analisis di cua ta esun representativo pa e deporte ey den nos pais, esta cu tin mas miembro y esun cu ta representa e deporte den nos teritorio di e isla di Aruba, cua ta esun cu ta representativo pa e deporte tambe.