Aruba Bank Walk & Run 2023 a culmina cu donacion na Respaldo

Aruba Bank Walk & Run a culmina dia 25 di mei unda e comunidad a bini hunto pa cana y core durante 4 dia largo den diferente districto di nos isla.

Un total di 2500 persona cu compromete nan mes na biba un bida mas saludabel y mehora nan mes a registra pa e evento aki y manera cu a anuncia previo na e evento un parti di e pago di registracion di e participantenan di Walk & Run lo bai pa Respaldo.

Diamars atardi Edseline Leer, Head of Retail Division di Aruba Bank conhuntamente cu Roxanne Croes, Sr Marketing Officer a bishita Respaldo pa asina haci e donacion aki oficialmente.

Dr. Van Gaalen hunto cu e team di maneho di Respaldo a keda hopi contento pa ricibi e sosten aki y cu e escohe pa pone atencion na personanan cu problema di salud mental, cual cifranan a aumenta den e ultimo añanan.  Aruba Bank a demostra atraves di e donacion aki cu nan ta reconoce e importancia di e servicio di salud mental den nos comunidad, y ta orguyoso di sostene Respaldo den nan esfuerzo pa duna sosten na tur esnan cu tin mester.