Dia mundial di medio ambiente, 5 juni 2023

1. Dia Mundial di Medio Ambiente dirigi pa UNEP (Programa di Nacionan Uni pa Medio Ambiente) y celebra cada 5 di junio desde 1973, ta e plataforma mundial mas grandi pa concientisacion ambiental y celebra pa miyones di persona den henter mundo.

 

TEMA PA 2023: #BeatPlasticPollution

Plastico tin mil y un uso practico, pero nos sociedad a bira adicto na single use plastics, cu consecuencianan severo social, economico, ambiental y pa salud.

Cada minut un miyon boter di plastico ta ser bendi riba Tera, y nos ta usa cinco triyon saco di plastico pa aña. Mitar di tur plastico produci ta ser diseña pa usa un biaha y benta afor,

Plastico ta presente den medio ambiente den tur skina di nos planeta y microplastics ta un problema serio pa cadena alimentaria den tur ecosistema y pa salud humano.

Di añanan 1950 te 1970 poco plastico tawata ser produci y desperdicio plastico tawata manehabel. Entre 1970 y 1990 produccion di plastico a triplifica y cu ne plastico como desperdicio.

Durante e prome añanan di siglo 21 e produccion di plastico den un solo decada a surpasa e cantidad produci den e 40 aña anterior hunto!

Awendia nos ta produci mas o menos 400 miyon tonelada di desperdicio di plastico.

Basa riba cifra disponibel ta premira un produccion di plastico di 1100 miyon tonelada pa 2050, mayoria di esaki den forma di single use plastics, di cual 36% ta den empaketahe di producto, y di cual 85% ta caba den landfills of lugarnan di sushi no controla.

Di tur e plastico single use 98% ta ser produci for di petroleo of gas (asina yama “virgin feedstock”).

Di e siete biyon tonelada di sushi plastico menos di 10% ta ser recicla, y e mayoria di plastico ta ser transporta pa dumpnan den pais di tercer mundo, ta perde den medio ambiente y riu y lagonan ta acumula plastico di cual 80% ta caba den oceanonan cu ta contene 200 miyon tonelada di plastico.

Na 2017 UNEP a lanza e Clean Seas Campaign pa combati polucion di plastico den oceanonan.

Na 2018 e tema pa Dia Mundial di Medio Ambiente tawata Beat Plastic Pollution.

Di aña 2018 te cu 2021 un cantidad di iniciativa a keda lanza pa combati polucion di plastico.

Na januari 2021 e Plastic Waste Amendments of the Basel Convention on the Control of Transboundary Movements of Hazardous Waste and their Disposal a drenta na vigor haciendo e tema di combati polucion di plastico un tema di prioridad.

Na maart 2022 durante e cumbre UNEA-5.2 na Nairobi ta adopta UNEA Resolution 5/14 “End plastic pollution: Towards an international legally binding instrument” (un Global Plastics Treaty).

Na juni 2022 e Intergovernmental Negotiating Committee ta inicia trabou riba e proceso pa yega na e tratado acorda den resolucion UNEA 5/14.

Na juli 2022 Union Europeo y Merca na e UN Ocean Conference ta anuncia cu nan a uni na e Clean Seas Campaign, asina demonstrando nan compromiso pa yuda combati polucion di plastico.

Den un segundo sesion di e Intergovernmental Negotiating Committee pa desaroya un instrumento huridico cu forza di ley internacional pa combati polucion di plastico (INC-2), teni 29 mei te cu 2 juni 2023 na Paris na e sede di UNESCO a keda acorda pa mas o menos 170 pais pa cuminza traha un promer concepto pa e tratado pa keda presenta na November 2023.

 

COMBATI POLUCION DI PLASTICO- UN RETO

Pa combati polucion di plastico tin cu haci un analisis di e factibilidad di e opcionan pa reduci e cantidad di plastico produci y e desperdicio di plastico.

Pa esaki nos lo usa e 5 Rs of Plastics, esta Refuse, Reduce, Reuse, Repurpose/Recover y Recycle.

Mayoria di producto di single use ta deriva di petroleo y gas. Asina produccion di plastico actual ta contribui na cambio climatico.

E industria di combustibel fosil ta buscando manera pa frena e proceso pa reduci produccion di plastico, creando e falso impresion cu por recicla gran percentahe di plastico produci.

Greenpeace USA den su rapport di 2020, titula Circular Claims Fall Flat. Comprehensive US Survey of Plastics Recyclability ta desbarata factibilidad di reciclahe di plastico pa combati polucion di plastico, un ponencia tambe sosteni pa e organisacion internacional The Plastic Soup Foundation.

Ademas, den un rapport recien di Greenpeace USA saca na 2023 den cuadro di e Global Plastics Treaty, cu titulo Forever Toxic. The Science on Health Threats from Plastic Recycling ta conclui cu plastico ta inherentemente incompatibel cu un economia circular.

Den e articulo Critiques of the Circular Economy (H. Corvellec et alii, Journal of Industrial Ecology 2022:26:421-432) ta destaca varios factor pa cuestiona e implementacion di e concepto di economia circular, di cual reciclahe ta keda señala como un punto debil y menos factibel.

Por conclui cu reciclahe di plastico por ser descarta como manera pa combati polucion di plastico.

Ta keda e otro cuater Rs di Plastics, esta Refuse, Reduce, Reuse, Repurpose/Recover.

Nenga cierto producto cu ta contene plastico ora tin alternativa pa plastico (Refuse) ta e promer opcion pa reduci polucion di plastico. E di dos opcion ta reduci e cantidad di plastico (Reduce).

Pa cierto tipo di plastico reuso tambe ta un opcion, pero obviamente cu su limitacionan.

E opcion Repurpose/Recover ta referi na usa plastico como un base pa via proceso mecanico of chimico converti esaki den materia prima pa crea otro producto of material.

Un ehempel ta conversion di plastico den biofuel cu tambe ta contribui na cambio climatico.

E buskeda pa haña materia prima of chimico alternativo pa remplaza e uso di plastico a conduci entre otro na e industria di bioplastics.

E articulo A Review of Bioplastics and their Adoption in the Circular Economy (Di Bartolo et alii, Polymers 2021, 13, 1229) ta mustra cu polimero biodegradabel como base pa bioplastics, nan aplicacion, produccion y degradabilidad como desperdicio ainda no ta bon defini y ta aporta den un forma minimo na e produccion di alternativa pa plastico deriva di petroleo y gas como materia prima.

Un otro articulo, Plastic Pollution: Are Bioplastics the Right Solution (Mastrolia et alii, Water, 2022, 14, 3596) ta mustra cu tin hopi interogativo pa cu uso di bioplastics como alternativa pa plastico.

Ademas tin cu remarca cu hopi bioplastics ta deriva di cultivo den agricultura manera trigo, maishi, caña di sucu, azeta y celulosa vegetal y producto deriva di desperdicio di producto agricola y alimento cu ta bay perdi como food waste den e cadena di suministro di producto pa alimentacion.

Seguridad alimentario, impactonan di cambio climatico riba agricultura, degradacion y perdida di tereno pa agricultura, contaminacion ambiental y un poblacion creciente mundial di mas cu 8 biyon habitante, ta haci necesario optimaliza tereno disponibel pa cultivo di alimento y minimaliza perdida di alimento.

Esaki ta haci bioplastics deriva di agricultura y perdida di alimento eticamente cuestionabel.

Recapitulando, mester conclui cu combati polucion di plastico mester enfoca riba e factornan Refuse  y Reduce principalmente cu ta un cuestion di escogencia di consumidor.

Y pa loke ta empaketahe, kizas por bay haci uso di materia prima abundante cu nos antepasadonan tawata usa, esta santo y lodo, pa crea producto basa riba glas y ceramica y materia prima similar.

Hecho ta cu pa Combati Polucion di Plastico  mester busca alternativa no basa riba petroleo, gas, of materia prima deriva di agricultura of perdida di alimento.