Banco Central di Aruba ta confirma: Gastonan di gobierno, deficit financiero y debe relata na GDP a reduci substancialmente den aña 2022

Partido MEP a tuma nota di e ultimo publicacion di Banco Central caminda a relata e desaroyo economico, financiero y monetario cu pais Aruba a conoce den aña 2022.

Primeramente mester recorda con constantemente den e ultimo añanan partido MEP a ser demonisa cu e grito falso y mentiroso cu e partido aki nunca ora cu e ta den gobernacion a percura pa reduci e gastonan di gobierno. No ta solamente e partidonan di oposicion y specialmente AVP cu pa motibo di oportunismo politico te ainda ta fomentando e mentira aki pero tambe otro sectornan den comunidad ta sigui vocifera ciegamente e mentiranan aki. Y semper nan ta bin cu e mesun disco raya, esta cu ora MEP ta den gobernacion e gastonan di gobierno ta aumenta drasticamente. Sinembargo nada di esaki ta berdad y manera e dicho cu ta aplicabel pa nan ta bisa cu “piensa el ladron que todos son de su condicion”.

 Gastonan di gobierno a baha

Un instancia imparcial manera Banco Central di Aruba den su ultimo publicacion “State of the economy” pa e di 4 kwartaal 2022 a trece padilanti cu pais Aruba a conoce un reduccion (disminucion) substancial den e gastonan di gobierno den e aña 2022.

Den e tabel adhunto un y tur por mira con e desaroyo di gastonan di gobierno tabata durante e ultimo  6 añanan, esta durante Gabinete Wever Croes. 

Despues cu na 2020 nos a conoce un aumento substancial di e gastonan di gobierno y esaki debi na e pandemia (Covid) devastador cu a afecta tur pais na mundo incluyendo Aruba, nos por mira con e gobierno actual cu curashi a lora manga di camisa y sigui cu e maneho pa reduci e gastonan di gobierno. Na 2020 e gastonan di gobierno tabata 1860.9 miyon florin y esaki a cuminsa baha y yega te na 1393.4 miyon florin na 2022. Pues un reduccion substancial di 467.5 miyon florin den apenas 2 aña di tempo.

Deficit financiero y Debe/GDP a baha

Sin duda cu e reduccion  aki a yuda contribui na un reduccion drastico di nos deficit financiero, cu a baha for di 494.8 miyon florin na 2021 te na 47.5 miyon florin na 2022. Cu esaki tambe e epoca di AVP caminda nos a conoce deficitnan acumula di 2.2 Biyon florin den 8 aña definitivamente ta pertenece na pasado.

Locual a resalta tambe den e ultimo publicacion di Banco Central ta cu un otro indicador importante, esta e debe relata na e GDP (Debt/GDP), bao di e gobernacion actual a reduci for di 100.9% na 2021 te na 88.3% na 2022. Y tin tur siguransa cu esaki lo sigui baha den e proximo añanan debi na e surplusnan cu nos pais lo bay conoce.

Partido MEP ta felicita Gabinete Wever Croes cu a percura pa tur e reducionnan aki y asina sigui pone pais Aruba den e rumbo di progreso.