Parlamentario Ramón Yung ta urgi minister Cijntje pa atende situashon di DAMEN prome baka hoga na pos

Pa mas di dos luna i mei kaba pendiente pa Minister a bin bèk Parlamento

Parlamento pa mas di dos luna i mei kaba ta pendiente di Minister di ekonomia sr. Ruisandro Cijntje pa duna kontinuashon na e reunion di dia 14 di mart 2023, durante kual a trata e situashon di preokupashon di e astiyero DAMEN.

Minister Ruisandro Cijntje a pidi Parlamento espasio di tempu di algun siman, pero mientrastantu ya a kumpli 2 luna i mei sin ku e minister a regresá Parlamento pa duna kontesta riba preguntanan den e promé tanda.

DAMEN aña pasá a duna retiro na alrededor di 78 trahadó, pero últimamente DAMEN a publiká diferente anunsio den korant den kual tabata enbuska di trahadó i personanan interesá pa sigui formashon na e skol di formashon (Bedrijfsschool).

Aktualmente DAMEN ta den e proseso pa negosashon di un akuerdo laboral kolektivo ku e sindikato PWFC pa un termino di 3 aña, pero kual segun informashon ku parlamentario pa frakshon di MFK, Ramón Yung ta disponé, ketu bai ta den un impase i pa kual DAMEN ta menasá di bai korte.

Parlamentario Ramón Yung ta spera ku Minister Cijntje lo sabi di duna Parlamento e rèspèt nesesario i lo bin Parlamento pa duna kontesta na e diferente preguntanan pa kual ainda no tin kontesta.

Parlamentario Ramón Yung ta preokupá pa e situashon na DAMEN, teniendo kuenta ku rumornan insistente ku e situashon finansiero ta sigui unu delikado i pa kual e kompania madre di DAMEN ya a indiká ku DAMEN Kòrsou pa 2023 lo mester para riba su propio pianan i lo no por sufri pèrdida finansiero.

Tin tur indikashon ku pa logra skapa e astiyero, trahadónan un biaha mas lo mester entregá, pasó di otro forma lo no por logra un resultado positivo e aña aki, lokual na su turno lo por tin un resultado negativo ku lo redondá den siere dje astiyero.

P’e motibu ei ta di krusial importansia pa Minister Cijntje bin Parlamento pa kontestá e seri di preguntanan ku el a risibí den e promé tanda dje reunion di dia 14 di mart 2023, di manera ku Parlamento por tin un bista amplio i aklaratorio riba henter e situashon na DAMEN.

Ademas, Parlamento ketu bai ta pendiente tambe pa por haña “inzage” den e kontrato firmá ku DAMEN, komokiera ku ainda no tin klaridat i transparensha pa lokual ta kontenido di e akuerdo enkuestion.

Esaki ta impedí Parlamento pa por dispone di tur informashon nesesario, di manera ku por kontrolá ku DAMEN di su parti ta kumpliendo ku palabrashonnan hasí den e akuerdo.

Parlamentario pa frakshon di MFK ta urgi minister Ruisandro Cijntje pa tuma akshon rápido, promé ku baka mester hoga na pos.