Minister Dangui Oduber: Cu e decreto ministerial firma, programa di scol saludabel ta cuminsa un era nobo

Diaranson atardi Minister Oduber tabata na Hyatt Place caminda a tuma luga e firmamento di un decreto ministerial entre Ministerio di Salud Publico, Ministerio di Enseñansa y Ministerio di Asuntonan Social. Di e manera aki a oficialmente institui e “stuurgroep” nacional di Scol Saludabel.

E programa di Scol Saludabel ta forma parti di e Plan Nacional di prevencion di malesanan no transmisibel. Minister Oduber a splica cu e plan aki ta un plan integral cu a cuminsa na aña 2020 pero a para door di e pandemia. Pero manera cu pandemia a pasa e plan nacional di prevencion a cuminsa continua mas lihe posibel. 

Tres ministerio ta uni pa duna sosten financiero na un programa cu ta enfoca den crea un estilo di bida saludabel y hasi esaki pa implementa como rutina pa alumnonan y scolnan aki na Aruba. 

Den e programa Scol Saludabel no solamente ta enfoca riba salud fisico pero tambe riba salud mental, movecion y bienistar total di e muchanan. Mas salud un mucha ta, mas productivo e ta den bida. Otro programa cu semper tin e sosten di Minister Oduber ta e programa di JUMP18 cu ta wordo dirigi pa dr. Busari.

Minister Oduber ta kere firmemente den campañanan y programanan di prevencion. Prevencion ta e yabi pa tin un fondo di AZV cu ta keda sostenibel den futuro y pa haci esaki posibel nos mester cuminsa na nos muchanan. Actualmente tin 10 scol cu ta participando na e programa pero e meta ta pa tur scol basico y den futuro scolnan secundario tambe participa. 

Minister Oduber a gradici y desea tur e dapartamentonan cu ta bay participa na e proyecto hopi exito. E mandatario a gradici su coleganan Minister Endy Croes y Minister Rocco Tjon pa nan sosten.

Un danki na departamento di salud publico / Jeugd Gezondheids Zorg, departamento di asuntonan social, SKOA, SPCOA, IPA, DPS y GSA pa nan participiacion na un manera hopi activo. Ban nos tur hunto haci e proyecto aki uno sumamente exitoso pa nos muchanan. Un pabien na e stuurgroep di Scol Saludabel cu a keda institui. 

Minister Oduber ta sigur cu den futuro Aruba lo bay logra tin un comunidad mas saludabel y mas participativo cu sigur lo contribui na un desaroyo positivo pa nos pais.