E di 4 rekonosmentu pa un hóben ambisioso, e Strea di Margaret, a bai durante di e di 20 Konferensia Annual di Liderasgo Femenino pa Sadora Jean Charles.
E Strea di Margaret ta un premio di stimulashon pa un hóben di den Karibe, entre 15 i 30 aña, sea femenino òf maskulino.
Ta pa stimulá i rekonosé un hóben ambisioso, ku ta preparando pa un futuro briante. Ku e rekonosementu aki e hóben ta haña di e tim organisadó un mèntòr pa un aña.
Sadora ta ambisioso i determiná. El a nase na Port au Prince, Haiti, i ta úniko yu di su mayornan. Su mayornan a muda pa Kòrsou debí na situashon den nan pais i e a keda serka un tanta na Haiti kaminda el a yega te promé klas di skol sekundario.
Su tata a regla pa e reuní ku su mayornan na 2019. Aki el a kai den grupo 8 segun e sistema edukashonal na Kòrsou. E barera di idioma tabata un reto p’e pasobra e tabata papia unikamente kreyol i franses.
E tabata retá pa siña papiamentu i ingles pa por a sigui e lèsnan di eksamen final di skol básiko.
E tabata habrí pa siña i integrá maske ku e no tabata komprondé tur kos. Su tata a invertí den lès adishonal i awor aki e ta na SKAI den V.S.B.O. PKL.
Sadora, apesar di tur reto den enseñansa ta deskribí su mes komo un hende positivo, ku gusta yuda otro hende, e stima skol i ke siña mas.
Su pensamentu ta ku nada no por par’é si e deseá di hasié. Su ruta di bida a inspir’é pa yuda òf motivá hende di su mes nashonalidat i di Kòrsou.
E ta bisa ku e ke kompartí loke ku el a siña i e ke pasa loke e sa pa otro hende por ta mihó pa nan mes.
Su soño ta pa bira yùfrou na sea skol primario òf pa gruponan 1 i 2, pa por siña e generashon mas chikí.
E ta aktivo den e organisashon di skout AJMG Montagne i den iglesia kristian.
Sadora i su mayornan ta modelo pa kada un di nos. Nan ta inspirá kon famia ta promové abilidat i motivashon pa ta mihó.
E Strea di Margaret ta selebrashon na memoria di Margaret Justina-Janse (April 3, 1969 – July 19, 2019), un sostenedó leal di e Konferensia Anual di Liderasgo Femenino na Kòrsou ku a kuminsá na 2004.
Su sosten, enkurashamentu, vishon i dedikashon na éksito di e konferensianan ta sumamente apresiá.
Ta selebrá e energia ku el a laga atras ku e Strea di Margaret i ta konfia ku energia di e hóben rekonosé, lo stimulá otro hóben ambisioso.