Aruba cu presentacion riba turismo na embahador di Kazachstan

Director di ATA Europa Tirso Tromp a duna un presentacion riba Aruba como destinacion turistico na embahador Askar Zhumagaliyev di Kazachstan. Tambe presente tabata Minister Plenipotenciario mr. Ady Thijsen,

E presentacion aki a sali for di e combersacion cu Minister Thijsen tabata tin cu embahador Zhumagaliyev unda e embahador a indica cu Aruba por ta un destinacion potencial pa turismo for di Kazachstan y pesey elo ta interesa pa haya un presentacion pa papia esaki cu e autoridadnan riba e tereno di turismo na Kazachstan. Embahador Zhumagaliyev a bisa cu Kazachstan ta e pais den Central Asia cu economicamente ta hopi mas fuerte. Esey ta trece cune cu e promedio di habitante di Kazachstan cu por viaha, ta buscando destinacionnan mas leu cu loke ya caba nan conoce por ehempel Singapore y Dubai. Actualmente tin turista for di Kazachstan cu ta bishita Republica Dominicana. Aruba sigur por ta un opcion pa loke e turista aki ta busca.

Sr. Tromp den su presentacion a elabora riba kico Aruba ta brinda como destinacion turistico. E atraccion mas grandi di Aruba cu ta su playanan y su hendenan amical y servicial. Tambe cu Aruba tin un bon infrastructura pa loke ta un aeropuerto sofistica, bon caratera y Aruba ta “safe”. Ela repasa tambe riba e contrast por ehempel entre e costa zuid, cu awa calmo y e costa nort di Aruba, cu laman mas bruto. Tambe sr. Tromp a mustra riba e diferencia den e ciudad Oranjestad y San Nicolas. Banda di a ilustra e producto turistico di Aruba, Sr. Tromp a duna tambe un bista riba e factor cu turismo ta hunga den e economia y GDP di Aruba. Tambe con Aruba a bin ta recupera for di e pandemia y cu te ainda e mercado Mericano ta forma casi 80 porciento di tur e turistanan cu ta bishita Aruba.

Embahador Zhumagaliyev a gradici Tirso Tromp pa e bunita presentacion y a bisa cu awor lo mester bai na traha pa interesa e turista for di Kazachstan pa bishita Aruba. Pero prome lo mester traha riba un punto cardinal pa logra esaki, cu ta e conneccion aereo entre Kazachstan y Aruba. Embahador Zhumagaliyev a bisa cu na e momento aki tin unicamente vuelo di Air Astana pa Amsterdam desde Aqtau, cu ta un ciudad hopi chikito cu principalmente ta drei rond di e industria petrolero. Pa interesa turismo for di Kazachstan pa Aruba lo ta mas factibel si tin un conneccion cu Almaty, cu ta e ciudad mas grandi di Kazachstan cu mas cu 2 miyon habitante.

Minister Thijsen a bisa cu e ta mira aki un oportunidad grandi pa KLM cu via Schiphol por hiba e turista for di Kazachstan Aruba y lo ta bon pa toca e tema aki riba nivel gubernamental. Tambe lo interesante si na nivel di aeropuerto y aerolinea papia riba e posibilidad aki.