ACE Foundation ta mira bek riba un siman di muzik pa mucha 2023 eksitoso

Art Culture Education Foundation ta mira bek riba un Siman di Muzik pa Mucha 2023 sumamente fruktífero kaminda ku e muchanan ku tabata presente pa e tayernan durante di siman a siña hopi di diferente ritmo i géneronan di muzik internashonal. E siman a kuminsá ku un antesala di Siman di Muzik pa Mucha kaminda ku Dance & More a tene un show di talento kaminda ku a saka e tòp 3 di e presentashon nan pa forma parti di e apertura.

E siman a kuminsá ku un gran apertura na SKAL dia 20 di Mei ku diferente presentashon di entre otro Dance & More, School of Performing Arts Bonaire i ACE Kids Club. Tambe FMK a sa di sera e atardi di apertura ku bon ambiente. Durante siman nos muchanan di ACE Kids Club a hasi un tour den barionan di Boneiru kaminda ku nan a risibí workshop di Silver Bullets tokante di steelpan, SPAB ku a duna un workshop di baile ku ritmonan Afro-Caribense, Roots Vibrations ku su workshop di Reggae, Arnold van der Tang ku su workshop di “Boomwhackers”, Garry Francisco a duna workshop di perkushon riba ritmo di salsa, Casa de Musica ku su workshop di Brasband i finalmente djasabra e muchanan a bai Mangazina di Rei kaminda ku nan a siña kon pa toka Ka’i Orgel. E siman tabata habri pa tur mucha ku kièr a partisipá i tur dia despues di e workshop ACE Kids Club a hasi un show kaminda e temanan di siman di Muzik, “Muzik un lenga internashonal” i “Muzik ta konektá” tabata sentral.

Tur esaki a bin kulminá djadumingu últimoku un tremendo show riba plenchi di SKAl Un atardi bon bishitá i ku un variedat di show di mucha pa mucha. Diputado Jolinda Craane a keda sumamente enkantá ku loke ela mira i den su diskurso a bisa di ta “hopi kontentu di mira e desaroyo di kultura i talentonan bou di nos hóbennan i ku e ta ansioso pa mira mas di loke nos muchanan ta bai trese”.

E atardi di klousura a habri manera kustumber ku honor na nos himno di Boneiru i ku un orashon bou di guia di Sr. Segni Bernardina Direkteur di ACE Foundation. Di ei mesora a ranka sali ku e parti di presentashonnan kaminda ku Casa de Musica a trese un tremendo show di drumband. Despues di esaki a sigui dos presentashon riba piano, unu trese pa Florian Dammen ku Mayci Trenidad ku a interpretá e kantika “Diamonds” di Rihanna, despues Almar Nicolaas a para tras di piano i e hobensita Miraisha a trese su interpretashon di kantika Obedesé ku ta un kasnion di e legendario grupo “Pumpulunchi” trese den un bachi nobo.. Esaki ta e promé kantika ku ta parti di e proyekto “Mucha mester tende kantika di mucha” kaminda ku a skohe sinku kantika bieu di mucha pa hinka den un bachi moderno.

E atardi a sigui ku presentashon nan di basischoool de Pelikaan i Dance & More. E artista hóben Tyziano tambe a bini for di Kòrsou pa duna un presentashon ku a kai den bon tera serka e muchanan presente. Por a mira nan baila i kanta Tyziano su kantikanan te dilanti di esenario. Pa finalisá e atardi ACE Kids Club i tres klas di Skol Amplio Papa Cornes a uni forsa despues i presenta un bunita show ku a hiba e publiko den un biahe ront mundu. Art Culture Education Foundation ta yama danki na tur ku a duna un man pa hasi e Siman di Muzik pa Mucha 2023 un éksito. Trabounan ta sigui mesora riba mas proyektonan pa nos muchanan siña mas di kultura i pa duna nan e oportunidat pa desaroyá i ekspresá nan talentonan riba un nivel profeshonal.