Dios no solamente tin dominio riba tur cos pero tambe tin autoridad pa eherce
No ta existi, ni awor , ni tampoco nunca lo existi riba e mundo un hende , of un instancia, of un pais cu tin mas poder cu Dios.
Tur dia Dios ta tene misericordia di hende, tur dia Dios ta pordona pa motibo di esnan cu te ainda ta yama riba su nomber, esnan cu ta fiel na Dios riba e mundo aki.
Di Bo O Señor , ta e grandesa, e poder, e gloria, e victoria,y e mahestad,di berdad,tur loke ta den cielo y riba tera, e dominio ta di bo.
O Señor , y Abo ta halsa Bo mes riba tur cos.
Tanto rikesa como honor ta bini for di Bo, y Bo ta reina riba tur cos, y den Bo man tin poder y forsa, y ta den Bo man pa engrandese y fortalese cada un.
Pesey anto nos Dios, nos ta gradicibo, y ta alaba bo nomber glorioso.( 1 Cronicas 29:11).
Segun ciencia y technologia ta avansa, hopi hende ta cay den nan gara, y nan ta lubida ken tabata tey prome y ken ta creador di tur cos, y ken ta doño di tur cos.
Hasta e malbado, e colebra bieu , Dios a crea como angel, pero door di su maldad y orguyo, awe su nomber ta satanas.( Ezekiel 28:13-19).
No tin ningun manera Bo, O Señor, grandi bo ta,y Bo nomber ta grandi den poder.( Jeremias 10:6)
Y Maria a bisa: Mi alma ta engrandese Señor, y mi spirito a regosiha den Dios mi Salbador.
Pasobra E a mira e estado humilde di Su sirbiente.
Pasobra mira , for di awor tur generacion lo yamami bendiciona.
Pasobra Esun Poderoso a haci cosnan grandi pa mi y santo ta Su nomber.
Y su misericordia ta di generacion pa generacion pa cu esnan cu tin temor pa E.
E a haci hechonan poderoso cu Su brasa.
E a plama esnan cu tabata orguyoso den e pensamento di nan curason.
E a baha gobernantenan for di nan trono, y a halsa esnan cu tabata humilde.
E a yena esnan cu tin hamber cu cosnan bon, y manda riconan bay man bashi.( Lucas 1:46-53).
Ta tempo pa tur nos mayornan lesa y studia nan bijbel y asina splica nan yuinan ken berdadermente ta poderoso riba e mundo aki.
Ken tin poder pa cambia clima y subi temperatura, y ken tin poder pa pone awacero cay, y los tur biento riba superficie di mundo.
Pero tambe tin poder riba laman, pasobra e ta Dios y E ta Todopoderoso.
Internet no tin poder, gobernantenan cu poder militar monstruso pa destrui. no tin poder, compara cu e amor di Dios cu ta sobresali riba tur cos.
No tin placa na mundo cu por iguala cu e poder di Dios, no tin conocemento na mundo mas grandi cu esun di Dios, Dilanti di Dios tur sabi lo bira bobo, pasobra sabiduria puro y berdadero ta bini di Dios.
Den un mal tempo , ta e nomber di Dios ta wordo menta, y nos ta roga y sclama pa e mal tempo pasa bay, servicio meterologico por djis anuncia , pa hende por cuida curpa, pero esun cu tin poder pa cambia ruta y calma cos ta Dios.
Ta tempo pa nos tur realisa cu nos tin di bolbe bek serca Dios, y cuminsa contesta nos yuinan cu e berdad, cu e cambio climatologico ta Dios ta permiti,pa asina demostra e mundo cu Su binida ta serca.
